පාර්ලිමේන්තු සභා වාරය ඇරඹේ

අද (21) දිනට නියමිත පාර්ලිමේන්තු සභා වාරයේ කටයුතු මේ වනවිට ආරම්භ කර තිබේ.

ඒ, කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙනි.

සජීවී දර්ශන ඉහත වීඩියෝවෙන් නරඹන්න.

අද දේශබන්දු අධිකරණයට

අත්අඩංගුවට ගත් හිටපු පොලිස්පති දේශබන්දු තෙන්නකෝන් අද කොළඹ කොටුව මහේස්ත්‍රාත් අධිකරණයට ඉදිරිපත් කිරිමට නියමිතයි.

අපරාධ පරීක්‍ෂණ දෙපාර්තමේන්තුව විසින් හෝකන්දර පිහිටි නිවසේදී ඊයේ මොහුව අත්අඩංගුවට ගනු ලැබුවේ 2022 වසරේ මැයි මස 09 වනදා අරගලයට පහරදුන් බවට කියන සිද්ධියට අදාළවයි.

මෙම සිද්ධියට අදාළව තමන් අත්අඩංගුවට නොගන්නා ලෙස දේශබන්දු තෙන්නකෝන් ගොනුකළ අපේක්ෂිත ඇප අයදුම්පතක් ද කොළඹ කොටුව මහේස්ත්‍රාත් නිලූපුලී ලංකාපුර ඊයේ ප්‍රතික්ෂේප කරනු ලැබුවා.

ඇප අයදුම්පත ප්‍රතික්ෂේප කරමින් මහේස්ත්‍රාත්වරිය කියා සිටියේ නීතියට ගරු කරනු ලබන පුද්ගලයෙකු ඉදිරිපත් කරන අපේක්ෂිත ඇපයක් සලකා බැලීමේ හැකියාවක් අධිකරණයට ඇතත් අධිකරණයේ මගහැර සිටින දේශබන්දු තෙන්නකෝන් වැනි සැකකරුවෙකු ඉල්ලා සිටින ඇප ඉල්ලීම සලකා බැලීමට තම අධිකරණයට නොහැකි බවයි.

තමන් සැකකරුවෙකු ලෙස නම් කර සිටින බව දැන දැනත් අධිකරණය මගහැර සිටීම යුක්තිගරුක පුද්ගලයෙකු ලෙස සිදු නොකළ යුත්තක් බවද මහේස්ත්‍රාත්වරිය මෙහිදී සඳහන් කර තිබුණා.

මේ අතර මාසයකට අධික කාලයක් අධිකරණය මගහැර සැගව සිට වරෙන්තු ලැබූ හිටපු අමාත්‍ය රාජිත සේනාරත්නට මේ මස 29 වනදා අධිකරණය හමුවේ පෙනී සිටින ලෙස නියම කරමින් කොළඹ ප්‍රධාන මහේස්ත්‍රාත් තනූජා ලක්මාලි ඊයේ නියෝගයක් නිකුත් කළා.

අල්ලස් කොමිසම කළ ඉල්ලීමක් සලකා බැලීමෙන් අනතුරුව ප්‍රකාශන නියෝගයක් නිකුත් කළ මහේස්ත්‍රාත්වරිය අදාළ නියෝගය කොළඹ ප්‍රධාන මහේස්ත්‍රාත් අධිකරණ පරිශ්‍රයේ සහ රාජිත සේනාරත්න පදිංචි ස්ථාන 05ක අලවා ප්‍රදර්ශනය කරන ලෙස ද නියෝග කළා.

එමෙන්මල ශබ්ද විකාශන යන්ත්‍ර ඔස්සේ එය ප්‍රචාරය කිරීමට ද නියම කර තිබෙනවා.

කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට ලබා දී රජයට රුපියල් කෝටි දෙකකට අධික පාඩුවක් සිදු කළේයැයි පැවසෙන සිද්ධියක් සම්බන්ධයෙන් මොහුට වරෙන්තු නිකුත් කර තිබුණා.

තැපැල් සේවක වර්ජනය තවදුරටත්

සේවක පුරප්පාඩු ඇතුළු ඉල්ලීම් 19 ක් මුල්කර ගනිමින් තැපැල් දෙපාර්තමේන්තුවේ සේවකයන් ආරම්භ කර ඇති වැඩ වර්ජනය අද සිව්වන දිනටත් ක්‍රියාත්මකයි.

මේ අතර අද දිනයේදී තම ගැටලු කෙරෙහි අවධානය යොමු කරන ලෙස ඉල්ලමින් ජනාධිපතිවරයා වෙත සංදේශයක් ද භාර දීමට කටයුතු කරන බවයි තැපැල් වෘත්තිය සමිති පෙරමුණ සඳහන් කළා.

තැපැල් දෙපාර්තමේන්තුවේ සියළුම නිලධාරින්ගේ නිවාඩු අවලංගු කර ඇති පසුබිමක මෙම තැපැල් වර්ජනය ක්‍රියාත්මක අතර අද දිනයේත් කොළඹ මධ්‍යම තැපැල් හුවමාරුව ඇතුළු දිවයින පුරා ප්‍රදේශ රැසක තැපැල් කාර්යාල වසා දමා ඇති අයුරු දක්නට ලැබුණා.

බොරැල්ලේ පාරක් ගිලා බසී

බොරැල්ල පොලිස් වසමේ මොඩල්ෆාම් හන්දිය අසල සිට ඩී.එස් සේනානායක හන්දිය දක්වා වූ කොළඹ දෙසට ඇතුළුවන මාර්ගයේ ස්ථානයක ගිලා බැසීමක් හේතුවෙන් රථවාහන ගමනාගමනයට අවහිරතාවයක් සිදුව ඇතැයි වාර්තා වෙනවා.

මේ හේතුවෙන් කොළඹ දෙසට ඇතුළුවන මාර්ගය භාවිතා කරන රියදුරන් හැකිතාක් විකල්ප මාර්ග භාවිතා කරන මෙන් පොලිසිය රියදුරන්ට දන්වා සිටිනවා.

ඒ අනුව විකල්ප මාර්ග ලෙස මොඩල්ෆාම් හන්දිය හරහා කොළඹට ඇතුළු වන වාහන මොඩල්ෆාම් හන්දියෙන් කනත්ත වටරවුම දෙසට ගමන් කර බේස්ලයින් මාර්ගයට පිවිසෙන ලෙසත් රාජගිරිය දෙස සිට කොළඹට ඇතුළු වන වාහන ආයුර්වේද වටරවුමෙන් කොටා පාර ඔස්සේ කොළඹට ඇතුළුවන ලෙසත් පොලිසිය රියදුරන්ට දැනුම් දෙනවා.

අද කාලගුණයේ වෙනසක්

දිවයින වටා වන මුහුදු ප්‍රදේශවල ප්‍රධාන වශයෙන් වැසි රහිත කාලගුණ තත්ත්වයක් පවතින බව කාලගුණ විද්‍යා දෙපාර්තමේන්තුව පවසනවා.

සුළං බස්නාහිර සිට නිරිත දක්වා වන දිශාවලින් හමා එන අතර සුළගේ වේගය පැ.කි.මී. (25-35) පමණ විය හැකි බවයි එම දෙපාර්තමේන්තුව පවසන්නේ.

මාතර සිට හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල සුළගේ වේගය විටින් විට පැ.කි.මී. 50 පමණ දක්වා ඉහළ යා හැක.

මාතර සිට හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශ විටින් විට තරමක් රළු විය හැක.

අඟුණුකොලපැලැස්ස බන්ධනාගාරයේ රැඳවියන් 2 ක් මරන්න සයනයිඩ් ළඟ තබාගත් රැඳවියෙක් අත්අඩංගුවට

අඟුණුකොළපැලැස්ස බන්ධනාගාරයේ රඳවා සිටි හිටපු කොමාන්ඩෝ සෙබළුන් දෙදෙනෙකු සයනයිඩ් යොදා ඝාතනය කිරීමේ සැලසුමක් බන්ධනාගාර නිලධාරීන් විසින් ව්‍යර්ථ කර තිබේ. මෙම ඝාතන සැලසුම සඳහා සයනයිඩ් ළඟ තබාගෙන සිටි එම බන්ධනාගාරයේම තවත් රැඳවියෙකු නිලධාරීන් විසින් අත්අඩංගුවට ගෙන ඇත.

බන්ධනාගාර බුද්ධි අංශ වෙත ලද තොරතුරකට අනුව, පෙරේදා (18) දින සැකකාර රැඳවියා රඳවා සිටි සිර මැදිරිය පරීක්ෂාවට ලක් කර තිබේ. එහිදී සූක්ෂම ලෙස සඟවා තිබූ සයනයිඩ් පැකට්ටුවක් සොයාගත් බව බන්ධනාගාර මාධ්‍ය ප්‍රකාශක, කොමසාරිස් ජගත් වීරසිංහ මහතා තහවුරු කළේය. එම විෂ රසායනයේ ක්‍රියාකාරීත්වය පරීක්ෂා කිරීමේ අරමුණින් සැකකරු විසින් කටුස්සෙකුට එය ශරීරගත කර ඇති බවටද තොරතුරු ලැබී ඇති අතර, ඒ අනුව මියගිය කටුස්සෙකුගේ සිරුරක්ද සිරකුටිය ආසන්නයේ තිබී සොයාගෙන ඇත.

අත්අඩංගුවට ගත් රැඳවියාගෙන් සිදුකළ දීර්ඝ ප්‍රශ්න කිරීම්වලදී ඔහු විසින් මෙම ඝාතන සැලසුම පිටුපස ඇති තොරතුරු රැසක් හෙළිදරව් කර තිබේ. ‘කුඩු සළිඳු’ නැමැත්තාගේ උපදෙස් මත රුපියල් ලක්ෂ 10ක කොන්ත්‍රාත්තුවක් අනුව තමන් මෙම ඝාතනය සිදු කිරීමට සූදානම් වූ බව සැකකරු පාපොච්චාරණය කර ඇත.

මෙම සයනයිඩ් තොගය බන්ධනාගාරය තුළට රැගෙනවිත් තමා වෙත ලබා දුන්නේ මෑතකදී ඇප මත නිදහස්ව ගිය ‘විමුක්ති ශ්‍රීනාත්’ හෙවත් ‘උඩවලව පොඩී’ නමැති වෙනත් රැඳවියෙකු බවද සැකකරු ප්‍රකාශ කර තිබේ. ගංජා ළඟ තබා ගැනීමේ චෝදනාවකට ඇප ලබා දීමට නොහැකිව පසුගිය 6 වනදා රක්ෂිත බන්ධනාගාර ගතවූ එම පුද්ගලයා, පසුගිය 13 වනදා ඇප මත නිදහස්ව ගොස් ඇති බවට විමර්ශනවලදී තහවුරු වී ඇත.

මෙම ඝාතන කුමන්ත්‍රණය හෙළිවීමත් සමඟ ඉලක්ක වූ හිටපු කොමාන්ඩෝ සෙබළුන් දෙදෙනාගේ ආරක්ෂාව තහවුරු කිරීමට බන්ධනාගාර දෙපාර්තමේන්තුව වහාම පියවර ගෙන තිබේ. සිදුවීම සම්බන්ධයෙන් පුළුල් අභ්‍යන්තර විමර්ශනයක්ද ආරම්භ කර ඇති අතර, මියගිය කටුස්සාගේ සිරුර වැඩිදුර පරීක්ෂණ සඳහා අඟුණුකොළපැලැස්ස පොලිසිය වෙත භාර දී ඇත.

පෙට්‍රෝලියම් එකේ රැකියා මින්පසු සුදුසුකම් මත පමණයි

ලංකා ඛනිජ තෙල් සංස්ථාවේ (CPC) සහ ලංකා ඛනිජ තෙල් තොග ගබඩා පර්යන්ත සමාගමේ (CPSTL) රැකියා පුරප්පාඩු සඳහා බඳවා ගැනීම් සුදුසුකම් මත පමණක් සිදුකරන බවත්, ඒ සඳහා කිසිදු දේශපාලන බලපෑමකට හෝ හිතවත්කමකට ඉඩ නොදෙන බවත් එහි සභාපති ඩී. ජේ. රාජකරුණා මහතා අවධාරණය කරයි.

රටේ ඕනෑම සුදුසුකම් ලත් පුරවැසියෙකුට මෙම රැකියා අවස්ථා සඳහා අයදුම් කළ හැකි අතර, බඳවා ගැනීමේ ක්‍රියාවලියේදී කිසියම් අයදුම්කරුවෙකු හඳුනාගැනීමක් මත පැමිණි බවට අනාවරණය වුවහොත් ඔහුව නුසුදුස්සෙකු ලෙස සලකා ඉවත් කිරීමට පියවර ගැනේ.

තවද, රැකියා ලබාදීම සඳහා මුදල් ලබා ගැනීමක් හෝ ලබා දීමක් සිදු කර ඇති බවට තහවුරු වුවහොත්, එම ගනුදෙනුවට සම්බන්ධ සියලු පාර්ශ්වයන්ට එරෙහිව දැඩි නීතිමය ක්‍රියාමාර්ග ගන්නා බවද සභාපතිවරයා තරයේ ප්‍රකාශ කළේය.

මීට පෙර පැවති සම්ප්‍රදායට අනුව, ඉහළ නිලධාරීන්ගේ හෝ දේශපාලනඥයන්ගේ මැදිහත්වීමෙන් මෙන්ම විශාල වශයෙන් අල්ලස් ලබාගෙන මෙම ආයතනවලට සේවකයින් බඳවාගෙන ඇති බවට තොරතුරු වාර්තා වී ඇති පසුබිමක, මෙම නව විනිවිද පෙනෙන ක්‍රමවේදය හඳුන්වා දී ඇති බව ඔහු වැඩිදුරටත් පැවසීය.

තීරු බදු රහිතව ශ්‍රී ලංකාවේ ඇගළුම් ගන්න බ්‍රිතාන්‍යය සූදානම්

ශ්‍රී ලංකාවේ ඇඟලුම් නිෂ්පාදකයින්ට ඕනෑම රටකින් ආනයනය කරන අමුද්‍රව්‍ය භාවිතයෙන් නිපදවන ඇඟලුම් සඳහා තීරුබදු රහිතව බ්‍රිතාන්‍ය වෙළෙඳපොළට ප්‍රවේශ වීමට අවස්ථාව සලසමින්, එරට වෙළෙඳ නීති සංශෝධනය කර තිබේ.

මෙම නව නීති ලිහිල් කිරීම තුළින් ශ්‍රී ලාංකික ඇඟලුම් කර්මාන්තයට පෙර නොවූ විරූ ලෙස එක්සත් රාජධානි වෙළෙඳපොළට ප්‍රවේශ වීමට අවස්ථාව උදාවන බව බ්‍රිතාන්‍ය රජය නිවේදනය කරයි. මීට පෙර මෙම තීරුබදු සහනය හිමිවූයේ ශ්‍රී ලංකාවේම අමුද්‍රව්‍ය යොදාගෙන නිෂ්පාදනය කළ ඇඟලුම් සඳහා පමණි.

සංවර්ධනය වෙමින් පවතින රටවල් සඳහා වන වෙළෙඳ යෝජනා ක්‍රමය (DCTS) යටතේ සිදුකරන මෙම වෙනස 2026 වසරේ මුල් භාගයේ සිට ක්‍රියාත්මක වීමට නියමිතය. මෙමගින්, ර

ෙදි නිෂ්පාදනය සහ ඇඟලුම් නිෂ්පාදනය යන අදියර දෙකම ශ්‍රී ලංකාව තුළ සිදුවිය යුතු බවට පැවති නීතිය ද ඉවත් කෙරෙනු ඇත.

ශ්‍රී ලංකාවේ බ්‍රිතාන්‍ය මහකොමසාරිස් ඇන්ඩෲ පැට්‍රික් මහතා පවසන්නේ මෙම වෙනස ශ්‍රී ලංකාවේ ඇඟලුම් අංශයට සැලකිය යුතු ධනාත්මක බලපෑමක් ඇති කරන අතරම, එක්සත් රාජධානියේ පාරිභෝගිකයින්ට ඇඟලුම් මිල අඩු කිරීමටද උපකාරී වනු ඇති බවයි.

පද්මේ කල්ලියේ 10ක් සමග අවි ගණේමුල්ලෙන් අල්ලයි

කිසියම් දැවැන්ත ප්‍රහාරයක් ක්‍රියාත්මක කිරීම සඳහා සූදානමින් සිටි පාතාල කල්ලි නායක කෙහෙල්බද්දර පද්මේගේ කල්ලියේ සාමාජිකයන් දසදෙනකු සමග අවි ගබඩාවක් අත්අඩංගුවට ගැනීමට ගම්පහ කොට්ඨාස අපරාධ අංශය සහ ගණේමුල්ල පොලිසිය සමත් වී ඇත.

ගණේමුල්ල ප්‍රදේශයේ පිහිටි නිවසක් මුලින් වැටලූ පොලිසිය එහි සිටි පාතාල නායක පද්මේගේ කල්ලියේ සමීපතමයන් 06 දෙනකු අත්අඩංගුවට ගත් අතර ඔවුන් සතුව එම නිවසේ සඟවා තිබූ රිපිටර් වර්ගයේ තුවක්කුවක්, ටී 56 මැගසින් 09ක්, ජීව උණ්ඩ 600ක් සොයාගෙන තිබේ.

පසුව එම පාතාල සාමාජිකයන්ගෙන් ප්‍රශ්න කිරීමේදී හෙළි වූ තොරතුරු මත මීගමුව ප්‍රදේශයේ තවත් නිවසක් වැටලූ පොලිසිය එහි සිටි පාතාල සාමාජිකයන් තිදෙනකු සමඟ බ්‍රවුනින් පිස්තෝලයක් කඩුවක් සමග තවත් ආයුධ කීපයක් අත්අඩංගුවට ගෙන ඇත.

පසුව කටාන ප්‍රදේශයේ තවත් නිවසක් වැටලූ පොලිසිය එහි තිබී රුපියල් ලක්‍ෂ 50කට අධික වටිනාකමෙන් යුත් අයිස් මත්ද්‍රව්‍ය තොගයක් සහ අවි ආයුධ කීපයක් සමග පාතාල සාමාජිකයකු ද අත්අඩංගුවට ගෙන තිබේ.

මෙසේ අත්අඩංගුවට පත් පාතාල සාමාජිකයන් විදේශගතව සිටින කෙහෙල්බද්දර පද්මේගේ කල්ලියේ මහ මොළකරු ලෙස හැඳින්වෙන කොමාන්ඩෝ සලින්ත සමග ඍජු සම්බන්ධතා පවත්වාගෙන ගිය පාතාල සාමාජිකයන්ය.

මොවුන් කිසියම් දැවැන්ත ප්‍රහාරයක් එල්ල කිරීමේ අරමුණින් මෙසේ සංවිධානය වී සිට ඇති බව පොලිසිය පවසයි.

සැකකරුවන් රඳවාගෙන ප්‍රශ්න කිරීමේ නියෝග මත තබගෙන ප්‍රශ්න කිරීමට අධිකරණයේ සහය ලබාගැනීමට නියමිතය.

බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න, නියෝජ්‍ය පොලිස්පති නිශාන්ත සොයිසා, ජ්‍යෙෂ්ඨ පොලිස් අධිකාරි සහන් අමරසිංහ මහත්වරුන්ගේ අධීක්‍ෂණය යටතේ ගම්පහ කොට්ඨාස අපරාධ විමර්ශන ඒකකයේ ස්ථානාධිපති සිසිර ජයකොඩි මහතා ඇතුළු නිලධාරීහු විමර්ශන පවත්වති.

රත්නපුර රෝහලේ විශේෂඥ වෛද්‍යවරු තිදෙනෙක් රාජකාරී වේලාවේ පුද්ගලික රෝහලක සේවයේ

රත්නපුර ශික්ෂණ රෝහලේ සේවයේ නියුතු විශේෂඥ වෛද්‍යවරුන් තිදෙනෙකු, සිය රාජකාරී වේලාව තුළදී පොදු චක්‍රලේඛ උල්ලංඝනය කරමින් පුද්ගලික රෝහලක සැත්කමකට සහභාගී වීම සම්බන්ධයෙන් විනය පරීක්ෂණයක් පවත්වන ලෙස රෝහල් අධ්‍යක්ෂවරයා සෞඛ්‍ය ලේකම්වරයාගෙන් ලිඛිතව ඉල්ලා තිබේ. මෙම සිදුවීම පසුගිය අගෝස්තු 14 වන දින සිදුව ඇති බව පැමිණිල්ලේ සඳහන් වේ.

මේ පිළිබඳව අදහස් දැක්වූ රත්නපුර ශික්ෂණ රෝහලේ අධ්‍යක්ෂ වෛද්‍ය ඉමේෂ් පුතාපසිංහ මහතා, “පුද්ගලික රෝහලක හදිසි අවස්ථාවකදී විශේෂඥ වෛද්‍යවරුන්ට සේවය සඳහා යා හැකි ක්‍රමවේදයක් චක්‍රලේඛ මගින් පැහැදිලි කර තිබෙනවා. ඒ අනුව, අදාළ පුද්ගලික රෝහල විසින් රජයේ රෝහලේ අධ්‍යක්ෂවරයා දැනුවත් කළ යුතු අතර, වෛද්‍යවරුන් යොමු කරන්නේ අධ්‍යක්ෂවරයා විසිනුයි. නමුත් මෙම අවස්ථාවේදී ඒ කිසිවක් සිදුව නැහැ,” යනුවෙන් පැවසීය. අදාළ වෛද්‍යවරුන් නියෝජ්‍ය අධ්‍යක්ෂවරයකු දැනුවත් කර පිටව ගොස් ඇති නමුත්, එවැනි අනුමැතියක් දීමට ඔහුට බලයක් නොමැති බවද අධ්‍යක්ෂවරයා පෙන්වා දුන්නේය. මෙලෙස පිටව ගොස් ඇත්තේ නොමේරූ ළදරු ඒකකය භාර ළමා රෝග විශේෂඥ වෛද්‍යවරයා, නිර්වින්දන විශේෂඥ වෛද්‍යවරයා සහ පැය 24 පුරා රාජකාරියේ සිටිය යුතු ප්‍රසව හා නාරිවේද විශේෂඥ වෛද්‍යවරයෙකි.

channel 7

Today News

පොහොය දවසේ මත්පැන් අලෙවි කරපු රාත්‍රී සමාජ ශාලාව

සිසුන් 50ට අඩු පාසල් 1506 ක්(WAKE UP TO 7)

නිවසක සිටි යුවළකට ආයුධවලින් පහරදී ඝාතනය කරලා

LIVE

Channel7 සජීව විකාශය නැරඹීමට පිවිසෙන්න

දින 60ක සටන් විරාමයකට ඊශ්‍රායලය සූදානම් බව ඇමරිකානු ජනපති ඩොනල්ඩ් ට්‍රම්ප් පවසයි