තෙදින නිල සංචාරයකට පෝලන්ත විදේශ කටයුතු ඇමැති ශ්‍රී ලංකාවට පැමිණෙයි.

ශ්‍රී ලංකා – පෝලන්ත සහයෝගීතාව තවදුරටත් ශක්තිමත් කරමින් තෙදින නිල සංචාරයක් සඳහා පෝලන්ත ජනරජයේ විදේශ කටයුතු ඇමැති රඩොස්ලාව් සිකෝර්ස්කි මහතා අද දින (28) මෙරටට පැමිණීයේය.

විදේශ කටයුතු හා විදේශ රැකියා නියෝජ්‍ය අමාත්‍ය ගරු අරුන් හේමචන්ද්‍ර මහතා විසින් එතුමාව පිළිගනු ලැබීය.

යුරෝපා සංගම් කවුන්සිලයේ සභාපතිත්වය දරන පෝලන්ත ජනරජයේ විදේශ කටයුතු ඇමැති රඩොස්ලාව් සිකෝර්ස්කි මහතා, එළඹෙන 31 වැනිදා දක්වා ශ්‍රී ලංකාවේ නිල සංචාරයක නිරත වීමට නියමිතයි.

ඔසප් චක්‍රය පිළිබඳ සමාජයෙන් නැගෙන අපවාදවලින් දුක් විඳින කාන්තාවන් මුදවා ගැනීම අත්‍යවශ්‍යයි. – අග්‍රාමාත්‍ය ආචාර්ය හරිනි අමරසූරිය –

ඔසප් චක්‍රය පිළිබඳ සමාජයෙන් නැගෙන අපවාදවලින් දුක් විඳින කාන්තාවන් මුදවා ගැනීම අත්‍යවශ්‍ය බව අග්‍රාමාත්‍ය ආචාර්ය හරිනි අමරසූරිය පවසයි.

“ඔසප් දරිද්‍රතාවයට එරෙහි සාමූහික ක්‍රියාකාරීත්වය” යන තේමාවෙන් කොළඹ ගෝල්ෆේස් හෝටලයේ ඊයේ (27) පැවති Period Proud 2025″ සමුළුව අමතමින් අග්‍රාමාත්‍යවරිය මේ බව පැවසුවා ය.

එහිදී වැඩි දුරටත් අදහස් දැක් වූ අග්‍රාමාත්‍ය ආචාර්ය හරිනි අමරසූරිය,

කාන්තාවන්ගේ මාසික ඔසප්වීම අපහාසයට ලක්විය යුතු කරුණක් නොවන බවත්. එය ස්වභාවික සංසිද්ධියක් බවත්, ඔසප් සෞඛ්‍යය සහ ඔසප් දරිද්‍රතාවය යනු හුදෙක් සෞඛ්‍ය ගැටලුවක් පමණක් නොව, ගරුත්වය, සමානාත්මතාවය සහ මානව අයිතිවාසිකම් හා බැඳුණු කාරණයක් බවත් අවධාරණය කළා ය.

ත්‍රිකුණාමලය, මහනුවර සහ කොළඹ ප්‍රදේශ කේන්ද්‍ර කරගනිමින් සිදුකළ නවතම සමීක්ෂණ වාර්තාවක් අනුව පාසල් සිසුවියන් රැසකට කාන්තා සනීපාරක්ෂක නිෂ්පාදන නොමැතිවීම හේතුවෙන් ඔවුන් පාසල් යාම මගහැරෙන බව හෙළි වී ඇති බවත්, එසේම බොහෝ කාන්තාවන් අනාරක්ෂිත විකල්පවලට යොමු වන බවත්, එය ඉතාම අවධානම් සහගත තත්ත්වයක් බවත් අග්‍රාමාත්‍යවරිය පෙන්වා දුන්නාය.

කාන්තාවන්ගේ ඔසප් සෞඛ්‍යය පිළිබඳ පවතින සමාජ අපවාද හේතුවෙන් බොහෝ කාන්තාවන් නිහඬව දුක් විඳින බවත්, මෙම තත්ත්වය වෙනස් විය යුතු බවත්, ඔසප් වීම කිසිවෙකුගේ සෞඛ්‍යයට, අධ්‍යාපනයට හෝ ගරුත්වයට බාධාවක් නොවන බව සහතික කිරීම සඳහා කඩිනමින් හා ක්‍රමවත් වැඩපිළිවෙලක් අවශ්‍ය බවත් කී අග්‍රාමාත්‍යවරිය,

වයස අවුරුදු 13ට වැඩි සියලුම පාසල් සිසුවියන්ට නොමිලේ කාන්තා සනීපාරක්ෂක නිෂ්පාදන ලබාදීමේ වැඩසටහනක් අධ්‍යාපන අමාත්‍යංශය විසින් දැනටමත් ක්‍රියාත්මක කර තිබෙන බව පෙන්වා දුන් අතර, විශේෂයෙන් එහිදී අඩු ආදායම්ලාභී පවුල්වල දැරියන් වෙත ප්‍රමුඛතාවය ලබාදීමට කටයුතු කර තිබෙන බවත්, කිසිදු ගැහැනු ළමයෙකුට ඔසප් වීම නිසා පාසල් යාම මග නෙහැරිය යුතුය යන්න තම පෞද්ගලික මතය බවත් අවධාරණය කළාය.

ලබන වසරේ සිට නැවත භාවිත කළ හැකි සනීපාරක්ෂක තුවා ලබාදීමේ වැඩපිළිවෙළක් ක්‍රියාත්මක කිරීමේ හැකියාව පිළිබඳව සලකාබලමින් සිටින බවත්, කාන්තා සනීපාරක්ෂක නිෂ්පාදන සඳහා වන සියලුම බදු ඉවත් කරන්නැයි යන ඉල්ලිම් ලැබී තිබෙන බවත්, මේ සම්බන්ධයෙන් යම් සාධනීය තත්ත්වයක් ඇති වී ඇතත්, එය සාර්ථක කරගැනීමට පුළුල් ප්‍රතිපත්ති සහ ප්‍රතිසංස්කරණ අත්‍යවශ්‍ය බවත් අග්‍රාමාත්‍යවරිය ප්‍රකාශ කළාය.

මේ පිළිබඳ මුදල් අමාත්‍යාංශය සමඟ සාකච්ඡා කරමින් බදු ඉවත් කිරීමේ වැඩපිළිවෙළ ඉදිරියට ගෙන යාමට අපේක්ෂා කරන බවත්, සිවිල් සමාජයේ සහ පෞද්ගලික අංශයේ සහාය ඒ සඳහා අපේක්ෂා කරන බවත් අග්‍රාමාත්‍ය ආචාර්ය හරිනි අමරසූරිය පැවසුවාය.

ඇඟලුම් කම්හලේ සේවය අහිමිවන සේවකයන්ට නීතියට අනුව ගෙවිය යුතු මුදලට වඩා වැඩි මුදලක් ගෙවීමට තම සමාගම තවදුරටත් සුදානම් – NEXT පාලනාධිකාරිය

කටුනායක නිදහස් වෙළඳ කලාපයේ පිහිටි NEXT ඇඟලුම් කම්හලේ සේවය අහිමිවන සේවකයන්ට මීට පෙර ප්‍රකාශ කළ පරිදි කම්කරු නීතියට අනුව ගෙවිය යුතු වන්දි මුදලට වඩා වැඩි මුදලක් ගෙවීමට තම සමාගම තවදුරටත් සුදානමින් පසුවන බව එහි පාලනාධිකාරිය පවසා තිබෙනවා.

ඇඟලුම් කම්හල හදිසියේ වසා දැමීම සම්බන්ධයෙන් විශේෂ සාකච්ඡාවක් කම්කරු අමාත්‍යංශයේ දී ඊයේ (27) පැවැත්වුණා. මේ සදහා ඇඟලුම් කම්හලේ පාලනාධිකාරය, වෘත්තීය සමිති නියෝජිතයන් සහ ශ්‍රී ලංකා ආයෝජන මණ්ඩලයේ නිලධාරීන් ද එක්ව සිටියා.

පාලනාධිකාරිය අවධාරණය කළේ මෙම කම්හල වසා දමීමට තීරණය වූයේ මෙහෙයුම් පිරිවැය අධික වීමෙන් පසුගිය වසර කිහිපය පුරා දැඩි ලෙස පාඩු ලබමින් සිටීම හේතුවෙන් බවයි.

මෙම කාර්මික ආරවුල විසඳා ගැනීමේ ඉදිරි පියවර පිළිබඳව කම්කරු කොමසාරිස් ජනරාල් නදීකා වටලියද්ද මහත්මිය ප්‍රකාශ කළේ ලබන 30 වැනිදා සේව්‍ය සේවක දෙපාර්ශවයම කැඳවා කම්කරු ක්‍රියාපටිපාටියට අනුව කටයුතු කරන බවයි.

ඊට දෙපාර්ශවයම එකඟ වීමෙන් අනතුරුව අද පැවති සාකච්ඡාව අවසන් වුණා.

ඇමරිකාව ජාත්‍යන්තර සිසුන් සඳහා නව වීසා සම්මුඛ පරීක්ෂණ අත්හිටුවයි

ජාත්‍යන්තර සිසුන් සඳහා නව වීසා සම්මුඛ පරීක්ෂණ අත්හිටුවන ලෙස, Donald Trump පරිපාලනය ඇමරිකානු තානාපති කාර්යාල සහ කොන්සල් කාර්යාලවලට උපදෙස් දී ඇතැයි Politico වෙබ් අඩවිය වාර්තා කරයි. එසේම ඔවුන් ජාත්‍යන්තර සිසුන්ගේ සමාජ මාධ්‍ය පරීක්ෂාව පුළුල් කිරීමට සලකා බලමින් සිටී.

ඇමරිකානු රාජ්‍ය ලේකම් Marco Antonio Rubio ඊයේ(27) අත්සන් කළ විදුලි පණිවුඩයකට අනුව, ඇමරිකාවේ අධ්‍යාපනය ලැබීමට අයදුම් කරන සියලුම ජාත්‍යන්තර සිසුන් ගේ සමාජ මාධ්‍ය පරීක්ෂාවට ලක් කිරීම අනිවාර්ය කිරීමට, Trump පරිපාලනය සලකා බලමින් සිටී. මේ සඳහා, ශිෂ්‍ය සහ හුවමාරු ආගන්තුක වීසා අයදුම්කරුවන්ට නව සම්මුඛ පරීක්ෂණ දින ලබා දීම අත්හිටුවන ලෙස, ඇමරිකානු රජය ලොව පුරා ඇමරිකානු තානාපති කාර්යාල සහ කොන්සල් කාර්යාලවලට උපදෙස් දී තිබේ. මීට පෙර සැලසුම් කෙරුණු වීසා සම්මුඛ පරීක්ෂණ තවදුරත් සිදු කළ හැකි බවටද දැනුම් දී ඇත.

Donald Trump යළි ජනාධිපති ධුරයට පත්වීමෙන් පසු, බොහෝ ඇමරිකානු විශ්ව විද්‍යාලවලට එරෙහිව පියවර ගෙන තිබේ. ඇමරිකානු මාධ්‍ය ක්ෂේත්‍රයේ පොදුවේ පවතින අදහසට අනුව, Trump පරිපාලනය Harvard විශ්ව විද්‍යාලය වැනි විශ්ව විද්‍යාලවලට එරෙහිව එවැනි පියවර ගෙන ඇත්තේ, මෙම විශ්ව විද්‍යාල වාමාංශික ලිබරල්වාදීන්ගේ හෝ ඩිමොක්‍රටික් පක්ෂයේ බලකොටු බවට රිපබ්ලිකන් පක්ෂය විශ්වාස කරන බැවිනි.
-CGTN Sinhala

පරිසර දිනයට සත්වෝද්‍යානයෙන් වැඩසටහන්.

පරිසර සතිය යෙදෙන මැයි මස 30 සිට ජුනි මස 5 දක්වා ජාතික සත්වෝද්‍යාන දෙපාර්තමේන්තුව විසින් වැඩසටහන් ගණනාවක් ක්‍රියාත්මක කෙරේ.

ජගත් පරිසර දිනයට සමගාමීව මෙය ක්‍රියාත්මක වන බවයි අධ්‍යක්ෂ ජෙනරාල් චන්දන රාජපක්ෂ මහතා පැවසුවේ.

ශ්‍රි ලංකාවට ආවේණික සත්ත්වයෙක් වන දිවියාව සංරක්ෂණය කිරීම මෙම සතිය තුළ සිදුකරන ප්‍රාධාන ම කර්තවයක් ලෙස සඳහන් වේ. එහිදි දිවියාව හෙවත් (ශ්‍රී ලංකාවේ කොටියා) කෘත්‍රිම ලෙස අභිජනනය කොට කොටි ගහණයක් බිහිකිරීම අරමුණු කර ඇත.

මැයි මස 30 වන දින ප්ලාස්ටික් කලමනාකරණයට සමගාමීව සත්වෝද්‍යාන පිරිසිදු කිරීමේ වැඩසටහනක් ක්‍රියාත්මකයි.
ඊට අමතරව දෙහිවල සත්වෝද්‍යානය, පින්නවල අලි අනාථාගාරය , පින්නවල සත්වෝද්‍යාන ය , රිදීගම සෆාරි උද්‍යාන වලදි පැල සිටුවිමෙ ව්‍යාපෘතියක් ජුනි 5 දින ක්‍රියාත්මක කෙරේ.
ඊට අමතරව මෙම සතිය තුල පාසල් ලමුන් දැනුවත් කිරීමෙ වැඩසටහන් සහ වෙරල පවිත්‍රතා වැඩසටහන් ක්‍රියාත්මක කිරීමට සැලසුම් කර තිබේ.

පොල් මිල අඩුවන ලකුණු

පොල් සංවර්ධන අධිකාරියේ කොළඹ පොල් වෙන්දේසියේ අද පොල් ගෙඩියක මිළ රු. 162.07ක් ලෙස සටහන් විය. ඊට හේතු වූයේ වෙසක් මුරය තුල පොල් අස්වැන්න වැඩි වීමයි. මේ බව සදහන් කලේ පොල් සංවර්ධන අධිකාරියේ අලෙවි අධ්‍යක්ෂ අනුරාධි හතුරුසිංහ සමග අප කල විමසීමක දීයි.

මෙසේ පොල් මිල අඩු උවද පොල් මිල සම්භන්දයෙන් තවත් ගැටලු පවතී. එනම් තොග පවත්වාගෙන යන ව්‍යාපාරිකයන් සතුව ඇති පොල් වල තොග මිළ නොවෙනස්ව පවත්වාගෙන යාමට ගන්නා උත්සාහය සහ පොල් කර්මාන්ත කරුවන්ට අවශ්‍ය පොල්මඳ ආශ්‍රිත නිෂ්පාදන පොල්ගෙඩි මිලියන 200 ක මඳවලට සමාන ප්‍රමානයක් ගෙන්වීම සඳහා රජයෙන් අවසර ලබාදී ඇතත් කර්මාන්ත කරුවන් ඒ සඳහා මැලිකමක් දැක්වීම ආදියයි.

ඔවුන්ද දේශීය පොල් ගෙඩි මිළදී ගැනීමට ක්‍රියා කරයි. එසේම කර්මාන්ත කරුවන් ඉල්ලා සටින්නේ පිටරටින් පොල්ගෙඩි ආනයනය කිරීමට අවසර දෙන ලෙසයි. නමුත් ශාක නිරෝදායන පනතට අනුව පොල් ගෙඩි ආනයනය කල නොහැකිය. වැඩිවන පොල් මිලට විසඳුමක් ලෙස අවම තත්වයන් යටතේ පොල් ගෙඩි ලෙස ගෙන්වීමට අවසර දීම සඳහා වාර්ථාවක් මේ වනවිට සකස් වෙමින් පවතී.

“ අධිකරණ පියස ” ව්‍යාපෘතියෙහි ගොඩනැගිලි දෙකක සහ අධිකරණ සංකීර්ණ හතරක ඉදි කිරීම් කඩිනම් කෙරේ.

අධිකරණ සහ ජාතික ඒකාබද්ධතා අමාත්‍යාංශය යටතේ ක්‍රියාත්මක ප්‍රධාන ඉදි කිරීම් ව්‍යාපෘතීන් වන අධිකරණ පියස ව්‍යාපෘතියෙහි ගොඩනැගිලි දෙකක සහ අධිකරණ සංකීර්ණ හතරක ඉදි කිරීම් කටයුතු කඩිනම් කරන ලෙස අධිකරණ සහ ජාතික ඒකාබද්ධතා අමාත්‍ය, නීතිඥ, හර්ෂණ නානායක්කාර මහතා අද ( 27) අදාළ නිලධාරීන්ට උපදෙස් ලබා දී තිබේ.

කොළඹ, අලුත්කඩේ අධිකරණ පියස ව්‍යාපෘතිය යටතේ ඉදි කිරීමට නියමිත අධිකරණ අමාත්‍යාංශ ගොඩනැඟිල්ල, මහේස්ත්‍රාත් අධිකරණ ගොඩනැගිල්ල, ගාල්ල අධිකරණ සංකීර්ණය, පූගොඩ දිසා මහේස්ත්‍රාත් අධිකරණ සංකීර්ණය, මාතලේ අධිකරණ සංකීර්ණය සහ කන්තලේ අධිකරණ සංකීර්ණය ඉදි කිරීම් කඩිනම් කිරීම සම්බන්ධයෙන් විශේෂ සාකච්ඡාවක් අධිකරණ සහ ජාතික ඒකාබද්ධතා අමාත්‍ය, නීතිඥ, හර්ෂණ නානායක්කාර මහතාගේ ප්‍රධානත්වයෙන් අද ( 27) පෙරවරුවේ අධිකරණ සහ ජාතික ඒකාබද්ධතා අමාත්‍යාංශයේදී පැවැත්විණි.

අධිකරණ පියස ව්‍යාපෘතිය, අධිකරණ සංකීර්ණයන්හි ඉදිකිරීම්වල ප්‍රගතිය සහ අධිකරණ යටිතල පහසුකම් සඳහා වෙන් කර ඇති ප්‍රතිපාදන වියදම් කළ යුතු ආකාරය සම්බන්ධයෙන් මෙහිදී අවධානය යොමු විණි.

කොළඹ, අලුත්කඩේ අධිකරණ පියස ව්‍යාපෘතිය යටතේ ඉදි කිරීමට නියමිත අධිකරණ අමාත්‍යාංශ ගොඩනැඟිල්ලෙහි පළමු අදියර සඳහා රුපියල් මිලියන 3500 ක්, අධිකරණ නිවහන ව්‍යාපෘතියෙහි මහේස්ත්‍රාත් අධිකරණ ගොඩනැගිල්ලෙහි පලමු අදියර වෙනුවෙන් රුපියල් මිලියන 4519 ක්, මාතලේ අධිකරණ සංකීර්ණයේ ඉදි කිරීම් සඳහා රුපියල් මිලියන 599 ක්, ගාල්ල අධිකරණ සංකීර්ණයේ ඉදි කිරීම් සදහා රුපියල් මිලියන 1686 ක්, පූගොඩ අධිකරණ සංකීර්ණය ඉදි කිරීම සඳහා රුපියල් මිලියන 882 ක් සහ කන්තලේ අධිකරණ සංකීර්ණය ඉදි කිරීම් වෙනුවෙන් රුපියල් මිලියන 244 ක මුදලක් වෙන් කර තිබේ.

මහල් තුනකින් සමන්විත පූගොඩ අධිකරණ සංකීර්ණය දිසා අධිකරණයක්, මහේස්ත්‍රාත් අධිකරණයක්, කාර්යාල සහ සෙසු පහසුකම්වලින් සමන්විතව ඉදි කිරීමට නියමිත අතර මෙම වසර තුළ එහි වැඩ අවසන් කිරීමට නියමිතව තිබේ.

අධිකරණ සහ ජාතික ඒකාබද්ධතා අමාත්‍යාංශය, ඉංජිනේරු කාර්යයන් පිළිබඳ මධ්‍යම උපදේශන කාර්යාංශය, රාජ්‍ය ඉංජිනේරු සංස්ථාව නියෝජනය කරමින් උසස් නිලධාරීන් මෙම සාකච්ඡාවට එක්ව සිටියහ.

වසර තුල සංචාරක පැමිණීම මිලියනය ඉක්මවයි.

මෙම වසර තුල විදේශීය සංචාරකයින්ගේ පැමිණීම මිලියනය ඉක්මවා ගොස් තිබෙනවා. 2025 ජනවාරි සිට මැයි 25 දක්වා සංචාරකයින් 1,006,097 ක් මෙරටට පැමිණ තිබේ.

මෙය පසුගිය වසරවලට සාපේක්ෂව වසරක් තුල අඩුම කාලයකින් සංචාරකයින් මිලියනයක සීමාව පසුකල වාර්තාව බවට පත්වේ.

රජය විසින් වැඩි වශයෙන් සංචාරකයින් ආකර්ශණය කර ගැනීමට මෙම වසර තුල විවිධ ක්‍රියාමාර්ග ගෙන තිබෙන ව සංචාරක අමාත්‍යංශය පවසනවා. මේ වසර අවසන් වන විට සංචාරකයින් මිලියන 03ක් ආකාර්ෂණය කරගැනීම රජයේ ඉලක්කය වී තිබෙනවා.

ඒ අනුව 2025 වසර සංචාරක පුනරුද වසර ලෙස නම් කර සංචාරක යටිතල පහසුකම් වැඩිදියුණු කිරීම සහ මෙම ක්ෂේත්‍රයේ නියැලී සිටින්නන්ගේ ධාරිතා වර්ධනය කිරීම ඇතුළු වැඩසටහන් රැසක් සැලසුම් කර තිබෙනවා.

සංචාරකයින් මිලියනක ඉලක්කය සපිරීම වේගවත් කිරීම සදහා සංචාරකයින්ට සේවා සහ පහසුකම් සැපයීමට පෞද්ගලික අංශය ඇතුළු විවිධ පුද්ගලයන් දක්වන අනගි දායකත්වය සංචාරක පුනරුදයට රුකුලක් වී තිබෙන බව අමාත්‍යං‍ශය වැඩි දුරටත් පවසයි.

දිවයිනේ දිස්ත්‍රික්ක කිහිපයකට නායයෑම් අනතුරු ඇඟවීම් නිකුත් කරයි.

ගාල්ල දිස්ත්‍රික්කයේ ඇල්පිටිය, කළුතර දිස්ත්‍රික්කයේ පාලින්දනුවර, මහනුවර දිස්ත්‍රික්කයේ ගඟඉහළ කෝරළය, පස්බාගේ කෝරළය, කෑගල්ල දිස්ත්‍රික්කයේ අරණායක, බුලත්කොහුපිටිය, යටියන්තොට සහ රුවන්වැල්ල යන ප්‍රාදේශීය ලේකම් කොට්ඨාස වල ජීවත් වන ජනතාවට විමසිල්ලෙන් පසුවන ලෙස ජාතික ගොඩනැගිලි පර්යේෂණ සංවිධානය ඉල්ලා සිටී.

අද පෙරවරු 10.00 සිට හෙට (28) පෙරවරු 10.00 දක්වා අදාළ අනතුරු ඇඟවීමේ නිවේදනය බලාත්මක වන බව ජාතික ගොඩනැගිලි පර්යේෂණ සංවිධානය සිය නිවේදනයේ වැඩිදුරටත් සඳහන් කරයි.

විශේෂ මදුරු මර්දන වැඩසටහනෙන් සුවිශාල ප්‍රගතියක්

පසුගිය 19 සිට 24 දක්වා පැවති මදුරු මර්දන සතියේදී පරිශ්‍ර 1470 කට නීතී මගින් ක්‍රියාකිරීමට පියවර ගත් බව අමාත්‍යංශය පවසනවා.
එම කාලය තුළ මදුරුවන් බෝවිය හැකි ස්ථාන සහිත පරිශ්‍ර 31,145 ක් හඳුනාගත් අතර මදුරු කීටයන් සහිත පරිශ්‍ර 6077ක් හදුනාගන්නා ලදි.

නිකුත් කල රතු නිවේදන ප්‍රමාණය 3916 කි. මදුරු මර්දන සතියේ වැඩසටහන දී දිවයින පුරා නිවාස 119,677 ක්, පාසල් 257ක් සහ වෙනත් අධ්‍යාපන ආයතන 304ක් පරික්ෂෂාවට ලක් විය.

රජයේ ආයතන 789, පෞද්ගලික ආයතන 5025 ක් ඉදිකිරීම පරිශ්‍ර , කර්මාන්ත ශාලා , පොදු ස්ථාන, ආගමික ස්ථාන හා අනෙකුත් ස්ථාන 1100 ක් පරික්ශාවට ලක් කෙරින.
විශේෂ මදුරු මර්දන වැඩසටහන් සතිය දිස්ත්‍රික්ක 15 ක සෞඛ්‍ය වෛද්‍ය නිලධාරී කොට්ඨාස 95 ක් ක්‍රේන්ද්‍ර කරගනිමින් ක්‍රියාත්මක විය.
මෙම වැඩසටහනේදී පරිශ්‍ර පරීක්ෂාව, රතු නිවේදන නිකුත් කිරීම, නීතී මගින් ක්‍රියා කිරීම , ප්‍රතිකාර සේවා ශක්තිමත් කිරීම ද අරමුණු විය.
වැඩසටහන ක්‍රියාත්මක කිරීමට ත්‍රිවිධ හමුදාව,ශ්‍රී ලංකා පොලිසිය, ජාතික සිවිල් ආරක්ෂක බලකාය සහ විවිධ ස්වේච්ඡා සංවිධාන යන්නෙහි සහයෝගය සෞඛ්‍යාංශ වෙත ලබා දුනි.

channel 7

Today News

පොහොය දවසේ මත්පැන් අලෙවි කරපු රාත්‍රී සමාජ ශාලාව

සිසුන් 50ට අඩු පාසල් 1506 ක්(WAKE UP TO 7)

නිවසක සිටි යුවළකට ආයුධවලින් පහරදී ඝාතනය කරලා

LIVE

Channel7 සජීව විකාශය නැරඹීමට පිවිසෙන්න

දින 60ක සටන් විරාමයකට ඊශ්‍රායලය සූදානම් බව ඇමරිකානු ජනපති ඩොනල්ඩ් ට්‍රම්ප් පවසයි