කැරම් බෝඩ් නඩුවේ ඇප ඉල්ලීම කල් යයි

කැරම් බෝඩ් සිද්ධිය සම්බන්ධයෙන් වරදකරු වී බරපතළ වැඩ සහිත සිර දඬුවම් නියම වී සිටින හිටපු අමාත්‍යවරුන් වන මහින්දානන්ද අලුත්ගමගේ සහ නලින් ප්‍රනාන්දු යන අය එම දඬුවමට එරෙහිව ඉදිරිපත් කර තිබෙන අභියාචනයට යටත්ව තමන්ව ඇප මත මුදාහරින ලෙස ඉල්ලා ගොනු කර ඇති පෙත්සම් සැප්තැම්බර් මස 23 වනදා කරුණු තහවුරු කිරීම සඳහා කැඳවන ලෙස කොළඹ ත්‍රිපුද්ගල ස්ථිර මහාධිකරණ විනිසුරු මඩුල්ල අද (25) නියම කළේය.

මෙම ඇප ඉල්ලීම අද මහේෂ් වීරමන්, ප්‍රදීප් අබේරත්න, අමාලි රණවීර යන මහත්ම මහත්මීන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී අල්ලස් කොමිසම වෙනුවෙන් පෙනී සිටි නීතීඥවරයා අධිකරණයට දන්වා සිටියේ මෙම පෙත්සම්වලට අදාළ නොතීසී තමන්ට ලැබී නොමැති බවය.

ඉදිරිපත් වූ කරුණු සලකා බැලූ විනිසුරු මඬුල්ල මෙම විත්තිකරුවන්ගේ ඇප ඉල්ලීම් සම්බන්ධයෙන් කරුණු දක්වන ලෙස දන්වා අල්ලස් කොමිසම වෙත නොතීසි නිකුත් කිරීමට නියෝග කරමින් පෙත්සම් යළි සැප්තැම්බර් 23 කැඳවීමට නියම කළේය.

අදාළ චෝදනා සම්බන්ධයෙන් සිර දඬුවම් ලබා සිටින තමන් ඊට එරෙහිව ශ්‍රේෂ්ඨාධිකරණයට අභියාචනා ඉදිරිපත් කර ඇති බැවින් එහි අවසන් තීන්දුවක් ලැබෙන තුරු තමන්ව ඇප මත මුදා හරින ලෙස ඉල්ලා මහින්දානන්ද අලුත්ගමගේ සහ නලින් ප්‍රනාන්දු යන හිටපු අමාත්‍යවරු විසින් මෙම පෙත්සම් ඉදිරිපත් කර ඇත.

මෙම අධ්‍යාපන ක්‍රමය තුළින් ඇතිකර ඇති විෂමතාවය වෙනස් කිරීම අපේ ප්‍රධාන අරමුණක් ” – අග්‍රාමාත්‍ය ආචාර්ය හරිනි අමරසූරිය

නව අධ්‍යාපන ප්‍රතිසංස්කරණ පිළිබඳව අග්‍රාමාත්‍ය ආචාර්ය හරිනි අමරසූරිය හා විදුහල්පති සහ ගුරු සංගම් සමඟ පවත්වන ලද විශේෂ සාකච්ඡාවක් අධ්‍යාපන අමාත්‍යංශයේ දී පැවැත්වුණි. මෙහි දී නව අධ්‍යාපන ප්‍රතිසංස්කරණ පිළිබඳව විදුහල්පති සහ ගුරු සංගම් වෙත ඇති ගැටලු සහ නව ප්‍රතිසංස්කරණවල විෂය මොඩියුල සම්බන්ධව දීර්ඝව සාකච්ඡා විය.

එමෙන්ම අධ්‍යාපන අමාත්‍යශය, ජාතික අධ්‍යාපන ආයතනය සහ ජාතික අධ්‍යාපන කොමිසම ඇතුළු ආයතන අතර පැවතිය යුතු අනෙයෝන්‍ය සම්බන්ධතාවයේ වැදගත්කම සහ ඒ තුළින් අධ්‍යාපන ක්ෂේත්‍රය තුළ සිදුවන සංවර්ධනය සම්බන්ධව අවධාරණය කරන ලදී.

” මේ අධ්‍යාපන ක්‍රමය තුළින් පවතින විෂමතාවය වෙනස් කිරිම අපට තිබෙන ප්‍රධාන අරමුණක්. ඒ අනුව දරුවන් පිරිසක් නොවෙයි සියලූම දරුවන්ට අපේ අධ්‍යාපන ක්‍රමය තුළ පිළිගත හැකි තැනකට එන්න පුලුවන් අධ්‍යාපන ක්‍රමයක් හදන එක අපේ මූලික ම පරමාර්ථයයි. ” යනුවෙන් අග්‍රාමාත්‍යවරිය වැඩිදුරටත් අදහස් ප්‍රකාශ කරමින් කියා සිටින ලදී.

තව ද මෙම නව අධ්‍යාපන ප්‍රතිසංස්කරණ වෙනුවෙන් වන විදුහල්පති සහ ගුරු සංගම්හි අදහස් හා යෝජනා ඉතාම වැදගත් වන බවත් ඉදිරියේ දී අධ්‍යාපන ප්‍රතිසංස්කරණ පිළිබඳව දිස්ත්‍රික් මට්ටමින් සියලු ගුරුවරුන් සමඟ සාකච්ඡා කිරීම වැදගත් බවත් අග්‍රාමාත්‍ය ආචාර්ය හරිනි අමරසූරිය ප්‍රකාශ කරන ලදී.

මෙම අවස්ථාව සඳහා අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශ ලේකම් නාලක කළුවැව මහතා ඇතුළු අධ්‍යාපන අමාත්‍යංශ‍යේ සහ ජාතික අධ්‍යාපන අයතනයේ නිලධාරීන් ද විදුහල්පති සහ ගුරු සංගම් සාමාජිකයන් ද සම්බන්ධ විය.

පුලතිසි සරුංගල් සැණකෙළිය පරාක්‍රම සමුදුරු වැවි බැම්මේ දී

සංස්කෘතික කටයුතු දෙපාර්තමෙින්තුව වාර්ෂිකව සංවිධානය කරන “නිල් අහසේ වසන්තය සරුංගල් සැණකෙළියට ” සමගාමීව පොළොන්නරුව දිස්ත්‍රික් ලේකමි කාර්යාලය , තමන්කඩුව ප්‍රාදේශීය ලේකම් කාර්යාලය ,පොළාන්නරුව මහ නගර සභාව සහ ප්‍රාදේශීය සභාව එක්ව සංවිධානය කළ ” පුලතිසි සරුංගල් සැණකෙළිය ඊයේ පස්වරුවේ පරාක්‍රම සමුදුරු වැවි බැම්මේ දී පැවැත්විණි.

ශ්‍රී ලංකා පාර්ලිමේන්තුවේ කතානායක ජගත් වික්‍රමරත්න මහතාගේ ප්‍රධානත්වයෙන් පැවති මෙම අඅවස්ථාවට පොළොන්නරුව දිස්ත්‍රික් පාර්ලිමේන්තු මන්ත්‍රීවරුන් වන සුනිල් රත්නසිරි , පද්මසිරි බණ්ඩාර , පොලොන්නරුව දිස්ත්‍රික් ලේකම් සුජන්ත ඒකනායක , තමන්කඩුව ප්‍රාදේශීය ලේකම් ඉන්දික කරුණාරත්න යන මහත්වරුන් ඇතුළු පිරිසක් සහභාගි වී සිටි අතර ජයග්‍රහක යන් සදහා මුදල් ත්‍යාග පිරිනැමිණි.

රනිල්ට හෙටත් ඇප ලබාගන්න බැහැ

රනිල් වික්‍රමසිංහ මහතා අත්අඩංගුවට ගෙන අධිකරණයට ඉදිරිපත් කරන ලද්දේ පොදු දේපළ පනත යටතේ චෝදනා ගොනු කරමින් නම් ඔහුට 26 වන දා ඇප ලැබීමේ හැකියාවක් තිබිය නොහැකි බව පෙරටුගාමී සමාජවාදී පක්ෂයේ දුමින්ද නාගමුව මහතා පවසයි.

මෙම පනත යටතේම චෝදනා ගොනු කරමින් තම පක්ෂයේ වසන්ත මුදලිගේ මහතා අත්අඩංගුවට ගෙන මාස තුනකට ආසන්න කාලයක් රක්ෂිත බන්ධනාගාර ගත කර සිටි බවද ඔහු පැවසීය.

ඒ අනුව රනිල් වික්‍රමසිංහ මහතාටද ඒ හා සමාන කාලයක් ඇප හිමි නොවණු ඇති බව විශ්වාස කරන්නේ ඇයිද හෙතෙම සඳහන් කළේය.

අභිනවයෙන් පත් වූ දූත මණ්ඩල ප්‍රධානීන් අග්‍රාමාත්‍යතුමිය හමුවෙයි

2025 අගෝස්තු 22 වන දින ශ්‍රී ලංකාවේ අභිනවයෙන් පත් වූ දූත මණ්ඩල ප්‍රධානීන් ශ්‍රී ලංකා අග්‍රාමාත්‍ය ආචාර්ය හරිනි අමරසූරිය අග්‍රාමාත්‍ය කාර්යාලයේදී හමුවිය.

ඉන්දුනීසියාව සඳහා නම් කරන ලද තානාපතිනි එස්. එස්. ප්‍රේමවර්ධන මහත්මිය, බ්‍රසීලය සඳහා නම් කරන ලද තානාපතිනි සී. ඒ. සී. අයි. කොලොන්නේ මහත්මිය, මාලදිවයින සඳහා නම් කරන ලද මහ කොමසාරිස් එම්. ආර්. හසන් මහතා, තුර්කිය සඳහා නම් කරන ලද තානාපති එල්. ආර්. එම්. එන්. පී. ජී. පී. බී. කදුරුගමුව මහතා, නේපාලය සඳහා නම් කරන ලද තානාපතිනි රුවන්ති දෙල්පිටිය මහත්මිය, කොරියානු ජනරජය සඳහා නම් කරන ලද තානාපති එම්. කේ. පත්මනාදන් මහතා සහ ඕමාන සුල්තාන් රාජ්‍යය සඳහා නම් කරන ලද තානාපති ඩබ්ලිව්. ඒ. කේ. එස්. ද අල්විස් මහතා මෙම නියෝජිත පිරිසට ඇතුළත් විය.

ශ්‍රී ලංකාව හා යහපත් සබඳතා වැඩි දියුණු කිරීමට, ජාත්‍යන්තරව ශ්‍රී ලංකාවේ ප්‍රතිරූපය ඉහළ නැංවීමට සහ ගුණාත්මක ආයෝජන ආකර්ෂණය කර ගැනීමට ප්‍රමුඛත්වය දිය යුතු බව අග්‍රාමාත්‍යතුමිය නව දූත මණ්ඩල ප්‍රධානීන් දිරිමත් කරමින් සඳහන් කළා ය. තවද, ඔවුන්ගේ සත්කාරක රටවල පවතින අවස්ථා පිළිබඳව අදහස් හුවමාරු කර ගත් අග්‍රාමාත්‍යතුමිය, ඔවුන්ගේ ඉදිරි රාජකාරි කටයුතු සාර්ථක කර ගැනීම සඳහා සිය සුභාශිංසන එක් කළා ය.

මෙම අවස්ථාවට අග්‍රාමාත්‍ය ලේකම් ප්‍රදීප් සපුතන්ත්‍රි මහතා සහ අග්‍රාමාත්‍ය අතිරේක ලේකම් සාගරිකා බොගහවත්ත මහත්මිය ද එක් වූහ.

කොළඹ දිසාව භාර නියෝජ්‍ය පොලිස්පති උදිත ලියනගේ CID අත් අඩංගුවට

ඒ නිදන් හැරීමේ සිදුවීමක් සම්බන්ධව අත්අඩංගුවට ගෙන සිටින ඔහුගේ බිරිඳ පිළිබදව සිදු කෙරෙන විමර්ශන කටයුතු සඳහායි.

අධිකරණයෙන් පිට විවිධ ප්‍රකාශ කර විපක්ෂය අධිකරණ ක්‍රියාවලියට බලපෑම් කරනවා

හිටපු ජනාධිපති – රනිල් වික්‍රමසිංහ මැතිතුමා ධුරය දැරූ කාලය තුළ විදේශ සංචාර 23ක් කර ඇති බවට වාර්තා වී තිබෙනවා. ඒ සංචාර අතරින් කියුබාවට සහ එක්සත් ජනපදයට ගොස් ආපසු එන අතර, එතුමාගේ භාර්යාවගේ උපාධි ප්‍රදානෝත්සවයකට රජයේ මුදල් වැයකර ලන්ඩනයට ගොස් නැවතී සිටීමක් සම්බන්ධයෙන් නඩු නිමිත්තක් තිබෙනවා. අධිකරණයට වාර්තා කර තිබෙන කරුණු අනුව ස්ටර්ලින් පවුම් 44,000කට වැඩි මුදලක් එම ගමන වෙනුවෙන් වැය කර ඇති බවයි. මේ සම්බන්ධයෙන් අධිකරණයට වාර්තා කර තිබෙන්නේ දණ්ඩනීති සංග්‍රහය සහ පොදු දේපළ පනත යටතේයි. මේ අධිකරණ ක්‍රියාදාමය ගැන අද (24 දා) උදේ මාධ්‍ය හමුවක් පැවැත්වූ විපක්ෂය විවිධ ප්‍රකාශ සිදු කළා. මහාචාර්ය ජී.එල්. පීරිස් මහතා ප්‍රකාශ කර තිබුණේ රනිල් වික්‍රමසිංහ මැතිතුමාව අත්අඩංගුවට නොගත යුතුව තිබූ බවයි. එතුමා ඉදිරිපත් කරන්නේ නීතිමය තර්කයක්. ඒ අත්අඩංගුවට ගැනීම සිදුකර තිබෙන්නේ, රාජ්‍යය සතු මුදල් හෝ සම්පත් කිසිම කෙනෙකුට අවභාවිතා කළ නොහැකියි යන පදනමෙනුයි. ඒක රටේ ජනාධිපතිවරයා, මැති ඇමතිවරු සිවිල් ජනතාව යන සියලු දෙනාටම එකම ආකාරයෙන් බලපවත්වන නීතියක්. රාජ්‍ය දේපළ ආරක්ෂා කර ගැනීමේ වගකීමක් රාජ්‍යයට තිබෙන නිසයි වාහන අනතුරකින් ලයිට් කණුවක් කඩාගෙන වැටුණත් තරාතිරම නොබලා වන්දි අය කරන්නේ.

නමුත් මෙතනදී විපක්ෂය දිගටම අධිකරණයේ ක්‍රියාමාර්ග විවේචනයට ලක්කරන්නේ අධිකරණයට අපහාසයක් සිදුකරනා ආකාරයෙන්. පොදු දේපළ පනත යටතට ගැනෙන්නේ රුපියල් 25,000ට වැඩි මූල්‍යමය අලාභයක් රජයට සිදුකිරීම සම්බන්ධ චෝදනා. මේ යටතේ අත්අඩංගුවට ගත් කෙනෙකු සුවිශේෂී කරුණු නැත්නම් ඇප ලබා නොදී, නඩු කටයුත්ත අවසන් වන තුරු රිමාන්ඩ් බන්ධනාගාර ගත කිරීම සිදු කළ හැකියි. මෙතැන නඩු නිමිත්ත වී තිබෙන්නේ පවුම් 44,000කට වැඩි, ලංකාවේ රුපියල්වලින් එක්කෝටිහැටඅට ලක්ෂයක මුදලක් සම්බන්ධයෙන්. නමුත් විපක්ෂය ජනගත කරන්න උත්සාහ කරන්නේ අධිකරණය දේශපාලනීය කරණයට ලක්කර තිබෙන බව සහ මේ මූල්‍ය අපරාධය අපරාධයක් නොවේය කියන කාරණය. පසුගිය කාලයේ එක පිරිසකට නීතිය ක්‍රියාත්මක කර, තවත් ස්ථරයකට නීතිය ක්‍රියාත්මක කළේම නැහැ. පොදුවේ ප්‍රකාශ කෙරුණේ, නීතිය කියන මකුළු දැලේ පොඩි සත්තු පැටලුණත් ලොකු සත්තු ඒක කඩාගෙන යන බවයි. අද වෙනකොට ඒ තත්වය වෙනස් කර, සෑම කෙනෙකුටම නීතිය එක හා සමාන ලෙස ක්‍රියාත්මක කරනවා. විපක්ෂය කියන්නේ ජනාධිපතිවරයෙකුට නිල හෝ පුද්ගලික බෙදීමක් ජීවිතයේ නැති බවයි. මේ ඉදිරිපත් කරන්නේ විත්තියේ තර්කයක් මිස, අධිකරණයේ තර්කයක් නොවෙයි. ජනාධිපතිවරයා මුදල් වියදම් කිරීමේදී ක්‍රියා කළ යුතු ආකාරය ගැන නීතියේ කිසිම සඳහනක් නැහැ. පොදු දේපළ පනතේ ජනාධිපතිවරයාට, ඇමතිවරුන්ට හෝ සිවිල් ජනතාවට ක්‍රියාත්මක කෙරෙන ආකාරය වෙන වෙනම දක්වා නැහැ.

විපක්ෂය කරන්නේ විත්තිය විසින් අධිකරණයට ඉදිරිපත් කළ යුතු තර්කයක් මාධ්‍ය හමුවේ ප්‍රකාශ කිරීමයි. එය අධිකරණය හමුවේ කළ යුතු දෙයක්. ලංකාවේ පවතින නීතිය, විමර්ශන ක්‍රියාවලිය සහ නීතිය ක්‍රියාත්මක කිරීම යන කරුණුවලදී අත්අඩංගුවට ගැනීමට නිමිත්තක් තිබෙනවා. ඒ වගේම මහේස්ත්‍රාත්වරයාගේ අභිමතය පරිදි රක්ෂිත බන්ධනාගාර ගත කිරීම හෝ ඇප මත නිදහස් කිරීමේ හැකියාව තිබෙනවා. මේ ක්‍රියාමාර්ග දියත් කර තිබෙන්නේ, මෙන්න මේ නීති රාමුව යටතේයි. අධිකරණයෙන් පිට විවිධ ප්‍රකාශ කරමින් විපක්ෂය සිදුකරන්නේ අධිකරණ ක්‍රියාවලියට විශාල බලපෑමක් සිදුකිරීමයි. ඒ බලපෑම රටේ සමාජ දේහයටම ඇතුල් වී අධිකරණය සම්බන්ධයෙන් පොදු ජනතාවට අවිශ්වාසයක් ඇති වෙන්න පුළුවන්. ඔවුන් කරන ප්‍රකාශ තුළ අධිකරණයට අපහාස කිරීමේ ගුණාංග සියල්ලම තිබෙනවා. 2023 දී අධිකරණයට අපහාස කිරීම සම්බන්ධයෙන් ක්‍රියාකරන්න වෙනම නීතියක් සම්මත කරගෙන තිබෙනවා. නිශ්චිත කාරණයට නිසි ආකාරයෙන් මුහුණ නොදී දේශපාලන අවශ්‍යතාවයක් මත විපක්ෂය ක්‍රියාකිරීම ඉතාම බරපතළයි. විපක්ෂය අද මාධ්‍ය ඉදිරියේ ඉදිරිපත් කළ තර්ක අධිකරණය ඉදිරියේ ඉදිරිපත් කර නැහැ. නමුත් එසේ නොකර, සමාජය ඉදිරියේ අධිකරණය හෑල්ලුවට ලක්කරන එක ඉතා බරපතළ තත්වයක්. මේ ආණ්ඩුව බලයට පත් වුණේ වංචා, දූෂණ සියල්ල නතර කර, එම වැරදි කළ අය අධිකරණය ඉදිරියට පමුණුවා යුක්තිය ඉෂ්ට කරනවා යන පොරොන්දුවට මහජන අනුමැතියක් ලබා ගැනීමෙනුයි. ඒ ගමන පටන් ගත් පසුව විපක්ෂය අධිකරණයට එරෙහි මතවාදයක් ගොඩනඟන්න උත්සාහ කරන්නේ ඊට බාධා කරන්නයි. ජනතාව සියලු දෙනාම මේ පිළිබඳව දැනුවත් වීම අත්‍යවශ්‍යයි.

නීතිමය අවකාශය තුළ නඩු පැවරීමේ සුජාතභාවය කිසිවෙකුටත් ප්‍රශ්න කළ නොහැකියි
නීතිඥ අකලංක උක්වත්ත
අද විපක්ෂයේ මාධ්‍ය හමුවට එකතු වී සිටි හිටපු පාලකයන් පසුගිය අවුරුදු 76ක කාලය තුළ ජනතාව වෙනුවෙන් එකතු වී ක්‍රියා කළේ නැහැ. ආණ්ඩුක්‍රම ව්‍යවස්ථාව ඇතුළු නීති විශාරදයෙක් වගේම නීති පීඨයේ මහාචාර්යවරයෙක් වන ජී.එල්. පීරිස් මහතා නීතියේ ආධිපත්‍යය තුළ ගන්නා ලද ක්‍රියාමාර්ගයක් පිළිබඳව එළියේ සමාජයේ පිරිසක් ඒකරාශී කිරීමට මූලික වී සිටියා. ඔවුන් සඳහන් කරන්නේ ප්‍රජාතන්ත්‍රවාදයට අනතුරක් සිදුවන බවයි. ඇමෙරිකා එක්සත් ජනපදයේ 41වැනි ජනාධිපති රොනල්ඩ් රේගන් එක අවස්ථාවක සඳහන් කර තිබෙන්නේ, “සැබෑ ප්‍රජාතන්ත්‍රවාදයට ඇතුළත් වන්නේ කුමක්දැයි අපි දනිමු. එම අර්ථයේ ඵලය අපි අවබෝධ කර ගනිමු. එනම් පාලකයන්ටත් ජනතාවටත් නීතිය එකසේ අදාළය.” යනුවෙනුයි. අද එකතු වුණු කට්ටිය මේ කරුණු ඔක්කොම දන්නවා. දැනගෙන තමයි ජනතාව ඉදිරියේ ඒ බව හංගාගෙන කතා කරන්නේ. ගිය සිකුරාදා අධිකරණය තුළ නීතිමය කරුණු නිසි ආකාරයෙන් අවධානයට ලක්කළ ගරු විනිශ්චයකාරතුමිය ඒ අවස්ථාවේදී විත්තිය සඳහන් කළ සුවිශේෂී කාරණා අදාළ සැකකරුට ඇපදීම සම්බන්ධයෙන් ප්‍රමාණවත් නොවෙන බව සලකා 26දින දක්වා රක්ෂිත බන්ධනාගාර ගත කළා. ඒ වගේම විපක්ෂයේ ප්‍රකාශකයන් උද්දීපනය කරන්න උත්සාහ කරන්නේ මෙම කටයුත්ත නිසි විමර්ශනයක් සිදු නොවුණු පොදු දේපළක් භාවිත නොවුණු කරුණක් බවයි.

නමුත් අධිකරණයට ඉදිරිපත් කළ ‘බී’ වාර්තාව තුළ සාක්ෂිකරුවන් 32දෙනෙකුගේ ප්‍රකාශ සටහන් කරගෙන, ඒවා ඒ උදෘත වගේම අදාළ ලේඛන ඇමුණුම් හැටියට සංවිධිතව අධිකරණයට ඉදිරිපත් කර තිබෙනවා. ඒ වාර්තා පදනම් කරගෙන රජයේ නියෝජ්‍ය සොලිසිටර් ජනරාල්තුමා විසින් කරුණු ඉදිරිපත් කර තිබෙනවා. මේක දේශපාලන පළිගැනීමක් බව කියන්නත් පිරිසක් උත්සාහ කරනවා. ෆොන්සේකා මහත්තයා කුදලාගෙන ගිහින් පස්සේ පරීක්ෂණ පැවැත්වූවා වගේ ක්‍රියාදාමයක් නොවෙයි මේක. විධිමත් පරීක්ෂණයක් සිදුකර වාර්තාවක් සකස් කර, අධිකරණයට ඉදිරිපත් කර තිබෙනවා. විදේශ අමාත්‍යාංශය සහ ජනාධිපති ලේකම් කාර්යාලය මගින් අවශ්‍ය ලේඛන ලබාගෙන හෙළිදරව් කරගෙන ඇති පරිදි සහ සාක්ෂිකරුවන් ලබාදුන් ප්‍රකාශ අනුව එංගලන්ත සංචාරය කිසිසේත්ම නිල කටයුත්තක් නොවෙයි. මේ සංචාරය වෙනුවෙන් පවුම් 44,000කට වැඩි මුදලක් වියදම් කර තිබෙනවා. මේ මුදල සංසන්දනාත්මකව තේරුම් ගැනීම වැදගත්. බි්‍රතාන්‍ය අග්‍රාමාත්‍යවරයාගේ මාසික වැටුප පවුම් 14,000යි. ඇමෙරිකානු ජනාධිපතිවරයාගේ වැටුප මසකට ඇමෙරිකානු ඩොලර් 33,000යි. ලංකාවේ ජනාධිපතිවරයාගේ දීමනා හැර මාසික වැටුප රුපියල් 97,500යි. ලංකාවේ ජනාධිපතිවරයෙක් වාර දෙකක් ධුරය දැරුවත් අවුරුදු දහයකදී ලබන්නේ රුපියල් එක්කෝටි දාහත්ලක්ෂයකට ආසන්න මුදලක්. ඒ අනුව බැලුවාම දවස් දෙකක මේ සංචාරය සඳහා වියදම ඊටත් වැඩිය විශාලයි.

අපරාධමය නඩුවක් සම්බන්ධයෙන් ශ්‍රී ලංකාවේ හිටපු ජනාධිපතිවරයෙක් අත්අඩංගුවට ගත් පළමු අවස්ථාව මෙයයි. මීට පෙර චන්ද්‍රිකා බණ්ඩාරනායක කුමාරතුංග හිටපු ජනාධිපතිවරියට ‘වොටර්ස් ඒජ්’ නඩුව මූලික අයිතිවාසිකම් සම්බන්ධයෙන් පවරා තිබුණා. මෛත්‍රීපාල සිරිසේන හිටපු ජනාධිපතිවරයාට දින 52 කුමන්ත්‍රණ නඩුව, පාස්කු දා ප්‍රහාරය පිළිබඳ නඩුව ඇතුළු මූලික අයිතිවාසිකම් නඩු පවරා තිබුණා. ගෝඨාභය රාජපක්ෂ සහ මහින්ද රාජපක්ෂට ආර්ථිකය බංකොලොත් කිරීම පිළිබඳව මූලික අයිතිවාසිකම් නඩු පවරා තිබුණා. අපරාධමය නඩුවක් සම්බන්ධයෙන් හිටපු ජනාධිපතිවරයෙකු අධිකරණයට ඉදිරියට පැමිණ වූ පළමු අවස්ථාව මෙයයි. නීතිමය අවකාශය තුළ මෙම නඩුව පැවරීම සම්බන්ධයෙන් පවතින සුජාතභාවය කිසිවෙකුටත් ප්‍රශ්න කරන්න බැහැ. අධිකරණයෙන් ලබාදුන් නියෝගය සම්බන්ධයෙන් පාර්ලිමේන්තුව තුළ හැර එයින් පිටත සිදුකරන සියලුම ප්‍රකාශයන් අධිකරණයට අපහාස කිරීමක් දක්වා ඉදිරියට යන්න පුළුවන්. එය මහජන කැළඹීමක් දක්වා වර්ධනය කළහොත් තත්වය තවත් බරපතළ වෙනවා. නීතිපතිතුමා මෙහිදී මැදිහත් වන්නේ දණ්ඩ නීති සංග්‍රහය හෝ වෙන ඕනෑම නීතිමය ප්‍රතිපාදනයක් මත මේ රටේ ජනතාව වෙනුවෙන්. නීතිය ජනතාව වෙනුවෙන් ක්‍රියාත්මක වන බව පේන්නේ දැන් තමයි. පොදු දේපළ පනත 1982 සිට මේ රටේ සිවිල් ජනතාවට විරුද්ධව දිගින් දිගටම යොදා ගත් හැටි අපි දැක්කා. ඒ නිසා අපි ජනතාවට අවධාරණය කරන්නේ සමස්ත සමාජයම වෙනස් කිරීමේදී තමනුත් වෙනස් විය යුතු බවයි. මේ දක්වා නීතිය උඩම ස්ථරයට ක්‍රියාත්මක නොවී පහළ ස්ථරයට පමණක් ක්‍රියාත්මක වුණා. ඒ තත්වය වෙනස් වී ඇති බව සුබවාදීව තේරුම් ගෙන වරදක් කර ඇත්නම් තරාතිරම නොබලා, නීතිය ක්‍රියාත්මක කෙරෙන බවට අවධාරණය කර ගැනීම වැදගත්. පසුගිය ජාතික මැතිවරණ දෙකේදී ජනතාව බලය ලබාදී තිබෙන්නේ රට සියලුම අංශවලින් ප්‍රගතිය කරා ගෙනයන්නයි.

අධිකරණයට කරුණු දැක්වීම වෙනුවට ජනතාව ඇවිස්සීමට විපක්ෂය අසාර්ථක කුමන්ත්‍රණයක යෙදී සිටිනවා
නීතිඥ හේමක සේනානායක
ඉහළ ස්ථරවල සිටි තෝරු මෝරුන්ට විරුද්ධව නීතිය ක්‍රියාත්මක වන ආකාරය මේ රටේ ජනතාව පළමු වර අත්දකිනවා. මේ ආණ්ඩුවට පහර දෙන්න පටන් ගන්නේ කොටුව, ගරු මහේස්ත්‍රාත්තුමිය විසින් ලබාදුන් නියෝගයක් පදනම් කර ගෙනයි. ගරු විනිසුරුතුමෙකු ලබාදුන් තීන්දුවක් සම්බන්ධයෙන් සෑහීමකට පත්වෙන්න බැරි නම් ඉහළ අධිකරණවලට යාමේ හැකියාව තිබෙනවා. නමුත් විපක්ෂය අලුත් තත්වයක් මතුකරමින් මාධ්‍ය ඉදිරියේ විවිධ කරුණු කියන්න පටන්ගෙන තිබෙනවා. අධිකරණය ඉදිරියේ හැර අනෙක් සියලුම තැන්වල නීතිය අර්ථ නිරූපණය කරන්න ආචාර්ය මහාචාර්යවරු පවා ඉදිරිපත් වී සිටිනවා. ඔවුන් මේ කරුණු ඉදිරිපත් කරන්නේ කාට විරුද්ධවද? හිටපු ජනාධිපති රනිල් වික්‍රමසිංහ එක්තරා අවස්ථාවකදී “අධිකරණ ම්ලේච්ඡත්වය” කියලා අදහසක් ඉදිරිපත් කරනවා. හිරිකිතයක් නැතිව මේ රටේ උත්තරීතර නීතිය සහ ව්‍යවස්ථාව කඩකරමින් ඔය වැනි ප්‍රකාශ සිදුකළා. අධිකරණ තීන්දු නොසලකා පුංචි ඡන්දය කල්දැම්මා. පුංචි ඡන්දයට මුදල් වෙන්නොකිරීම වැරදි බව ශ්‍රේෂ්ඨාධිකරණයෙන් තීරණය කළ අවස්ථාවේ එම ගරු විනිසුරුතුමන්ලා තිදෙනාම පාර්ලිමේන්තු කමිටුවක් හමුවට ඉදිරිපත් කළ යුතු බව ප්‍රකාශ කළ පිරිසක් අද මේ ආකාරයට මාධ්‍ය හමු පවත්වනවා. පාර්ලිමේන්තුවේ තේරීම් කාරක සභාවට විනිසුරුවරුන් කැඳවීම දේශපාලනික සියදිවි නසා ගැනීමක් බව පසුව ඔවුන්ට තේරී ඒ වැඩේ නවත්වා ගත්තා.

ත්‍රස්තවාදය වැළැක්වීමේ පනත යටතේ බොහෝ දෙනෙකු රඳවා තබාගෙන සිටියා. ගෝඨාභය රාජපක්ෂ මහත්තයාගේ පාලන කාලය තුළ දේශපාලන පළිගැනීම් පිළිබඳව සොයන බව සඳහන් කරමින් චෞර වළල්ල බේරා ගන්න කොමිසමක් පත් කළා. නීතිපති දෙපාර්තමේන්තුවේ සිටි විශිෂ්ටම නීතිඥවරු පවා මේ කොමිසම හමුවේ වැරදිකරුවන් කරන්න උත්සාහ කළ එකල ආණ්ඩුව සමග සිටි පිරිසක් අද මාධ්‍ය සාකච්ඡා පැවැත්වූවා. අධිකරණය විහිළුවට ලක්කර, අධිකරණයට කෑගසා, අධිකරණයට ගල්ගසා, විනිසුරුතුමන්ලාට බලපෑම් කළ කණ්ඩායමකට රිදෙන එක සාධාරණයි. වත්මන් ආණ්ඩුව යටතේ විනිසුරුවරයෙකුට අබමල් රේණුවක තරම්වත් බලපෑම් සිදුකර නැහැ. නමුත් රනිල් වික්‍රමසිංහ මහතා අත්අඩංගුවට ගත්තාත් එක්කම දෙබරයට ගල්ගැසුවා වගේ වුණා. ඉහළටම නීතිය ක්‍රියාත්මක කිරීමෙන් අනෙක් සියල්ලන්ටමත් ඒ නීතිය ක්‍රියාත්මක වෙන බව තේරුම් ගත් කණ්ඩායම එකට එකතු වී සිටිනවා. කොටුව ගරු මහේස්ත්‍රාත්තුමියට පෞද්ගලිකව පහර එල්ල කිරීමට පටන්ගෙන තිබෙනවා. නීතිය පිළිබඳව අධිකරණය ඉදිරියට ඇවිත් කරුණු කියනවා වෙනුවට රටේ ජනතාව ඇවිස්සීම සඳහා ඉතාමත්ම අසාර්ථක කුමන්ත්‍රණයක මේ අය යෙදී සිටිනවා. ජාතික ජන බලවේගයේ නීතිඥයන් හැටියට අපි මේ ගැන ඉතාමත් සුපරීක්ෂාවෙන් පසුවෙනවා. රනිල් වික්‍රමසිංහ මහතා වරදක් කර නැත්නම් අධිකරණයෙන් ඔහුව නිදහස් කරයි. නමුත් විපක්ෂයේ කණ්ඩායම් මේ උත්සාහ කරන්නේ කලින් තිබුණු ම්ලේච්ඡ යුගයට නැවතත් ගෙන යන්නයි. අපි අවධාරණය කරන්නේ නීතිය පිළිබඳව තීරණය කිරීම අධිකරණයට බාර දෙන ලෙසයි.

නීතියේ ආධිපත්‍යය නිසි ආකාරයෙන් ක්‍රියාත්මක කිරීම ලංකාවටත් වලංගුයි
නීතිඥ ජයන්ත දෙහිඅංගගේ
විපක්ෂයේ විවිධ කණ්ඩායම් ජනතාව නොමග යවන්න සහ ප්‍රකෝප කරන්න විවිධ ප්‍රකාශ කරමින් සිටින බව පේන්න තිබෙනවා. ජනතාව මේ දක්වා ප්‍රශ්න කළේ රටේ එක පිරිසක් නීතියට ඉහළින් සිටින්නේ ඇයි කියලයි. විශේෂයෙන්ම 2022 වසරේ මහජනතාව මේ පිළිබඳව විරෝධතා පවත්වමින් නීතිය කාටත් සමානව ක්‍රියාත්මක කළ යුතු බව අවධාරණය කළා. අපරාධ පරීක්ෂණ දෙපාර්තමේන්තුවට කර තිබූ පැමිණිල්ලක් අනුව දීර්ඝ විමර්ශන ක්‍රියාවලියක් අවසානයේ රනිල් වික්‍රමසිංහ මහතාගෙන් ප්‍රකාශයක් ලබාගෙන මේ අත්අඩංගුවට ගැනීම සිදු කළා. ඔහුට ඇප දෙනවාද නැද්ද යන්න තීරණය කරන්නේ අධිකරණයට ඉදිරිපත් වෙන කරුණු අනුව මිස ඔහු හිටපු ජනාධිපතිවරයෙක්, අගමැතිවරයෙක්, ඇමතිවරයෙක් වශයෙන් සලකා බැලීමෙන් නොවේ.

මේ ආණ්ඩුවට ජනවරමක් ලබාදී තිබෙන්නේ නීතිය කාටත් සාධාරණව ක්‍රියාත්මක කරන අධිකරණ ක්‍රියාවලියක් ශක්තිමත් කරන්නයි. මිනිසුන්ගේ ඉල්ලීම ක්‍රියාවට නැගෙමින් තිබෙන අතර, හිටපු ජනාධිපතිවරයා අත්අඩංගුවට ගැනීමෙන් කලබල වී සිටින පිරිස කවුද කියා බැලීම අවශ්‍යයි. ලෝකයේ රටවල් ගණනාවක රාජ්‍ය නායකයන් සම්බන්ධයෙන් විමර්ශන සිදුකර අත්අඩංගුවට ගැනීම් පමණක් නොව අධිකරණයෙන් දඬුවම් පැමිණවීම් පවා සිදුකර තිබෙනවා. නීතියේ ආධිපත්‍යය නිසි ආකාරයෙන් ක්‍රියාත්මක කරන එක ලංකාවට වලංගු වන්නේ නැද්ද? විපක්ෂයේ අය එකතුවී සිටියේ ‘ව්‍යවස්ථාපිත ඒකාධිපතිත්වයක්’ බව කියමින් සිටිනවා. විපක්ෂයට මේ සම්බන්ධයෙන් හරිහමන් මාතෘකාවක්වත් සොයා ගන්න නොහැකි වී තිබෙනවා. මෛත්‍රීපාල සිරිසේන ජනාධිපතිවරයා 2018 දී රනිල් වික්‍රමසිංහ අගමැති ධුරයෙන් පහකර මහින්ද රාජපක්ෂ පත්කිරීම නීති විරෝධී බව ශ්‍රේෂ්ඨාධිකරණය විසින් තීරණය කළා. ඒ අවස්ථාවේදී ඒ ක්‍රියාවලියට විරුද්ධව අධිකරණයට ගිය අය අද මොනවාද කරන්නේ. අපි ජනතාවට කියන්නේ නීතිය හැමදෙනාටම එක හා සමාන බව භාවිතයෙන් ඔප්පු කිරීම පිළිබඳව හොඳින් තේරුම් ගන්න කියලයි.

ක්‍රමයේ වෙනස කියන්නේ අධිකරණ තීන්දු තීරණ දේශපාලන යූටියුබ්කරුවන් පූර්වයෙන් ප්‍රකාශයට පත් කිරීමද ?

යුක්තිය පසිදලීමේ ක්‍රියාදාමය නීතියෙ ආධිපත්‍ය ක්‍රියාත්මක වීම ප්‍රජාතන්ත්‍රවාදීව නිවැරදිව සිදුවිය යුතු බවත් නිවැරදි ක්‍රමවේදයක් අනුගමනය කරන්නට සියලු දෙනාම සූදානම් වුවත් යූටියුබ් හරහා දෙන යුක්තිය සාධාරණත්වය ගැන කිසිදු එකගතාවක් නොමැති බවත් අධිකරණය මගින් ලබා දෙන තීන්දු සහ යුක්තිය පසිදලීමේ ක්‍රියාදාමය සම්බන්ධයෙන් දින ගණනාවකට පෙර දේශපාලන පක්ෂවල යූටියුබ් ක්‍රියාකාරීන් ප්‍රකාශයට පත් කරන්නේ කොහොමද කියා ගැටලුවක් ඇති බවත් එවැනි දෙයක් සිදුවිය නොහැකි බවත් විපක්ෂ නායකවරයා පැවසීය.

මෙය අධිකරණයට, යුක්තිය පසිදලීමේ ක්‍රියාදාමයට, ආණ්ඩුක්‍රම ව්‍යවස්ථාවට, උත්තරීතර නීතියට කරන අපහාසයක් බවත් ක්‍රමයේ වෙනසක් කියා සිදු කර ඇත්තේ මෙය ද කියා ප්‍රශ්න කරන බවත් ආණ්ඩුක්‍රම ව්‍යවස්ථාව හෝ යුක්තිය පසිදලීමේ යාන්ත්‍රණයේ නීති රීතී ක්‍රියාත්මක වීමේ දී විනිවිදභාවයක් පිරිසුදුභාවයක් තිබිය යුතු බවත් දේශපාලන යූටියුබ්කරුවකුට යුක්තිය පසිදලීමේ ක්‍රියාදාමයේ ගන්නා තීන්දු තීරණ පූර්වයෙන් ප්‍රකාශයට පත් කළ නොහැකි බවත් එවැනි දෙයක් සිදු වන්නේ ඒකාධිපතීත්වය රජකරවන ආඥාදායකත්වය රජකරවන රටක මිස අප රට වැනි ප්‍රජාතන්ත්‍රවාදය රජකරවන රටක එවැනි දෙයක් සිදු කළ නොහැකි බවත් විපක්ෂ නායක සජිත් ප්‍රේමදාස මහතා පැවසීය.

විපක්ෂ නායක සජිත් ප්‍රේමදාස මහතා මේ බව කියා සිටියේ රෝහල් ගත කර සිටින හිටපු ජනාධිපති රනිල් වික්‍රමසිංහ මහතාගේ සුවදුක් බැලීමට ජාතික රෝහලට පැමිණි අවස්ථාවේ මාධ්‍ය නැගූ ප්‍රශ්නවලට පිළිතුරු ලබා දෙමිනි.

යූටියුබ් නාලිකාවක් විසින් අත්අඩංගුවට ගන්නා පුද්ගලයන්, අත්අඩංගුවට ගන්නා දිනය සහ බන්ධනාගාර ගත කරන දින ගණන පවා ප්‍රකාශයට පත් කරන්නේ නම් එය යුක්තිය පසිදලීමේ ක්‍රියාවලිය තුළ සිටින අයට කරන අපහාසයක් බවත් යූටියුබ් නාලිකා හරහා යුක්තිය පසිදලීමේ ක්‍රියාදාමය සිදු කරන්න සමගි ජන බලවේගය සූදානම් නොමැති බවත් හැමෝටම නීතිය ක්‍රියාත්මක කිරීම එක හා සමානව සැලකීම ගැටලුවක් නොවුවත් දේශපාලන යූටියුබ්කරුවන් යුක්තිය පසිදලීමේ ක්‍රියාවලියට බලපෑම් කිරීම නීතිගරුක නොවන බවත් විපක්ෂ නායකවරයා පැවසීය.

තවද මේ අවස්ථාවේ විපක්ෂයේ පක්ෂ එකට සාකච්ඡා කරන්නේ දේශපාලන වාසි ලබා ගන්න නොවන බවත් මේ වන විට රටෙන් 50%ක් පමණ දුප්පත් වුවත් 75%ක් පමණ අස්වැසුම ඉල්ලා ඇති බවත් 2028 ණය ගෙවන්න නම් 5%ක ආර්ථික වර්ධනයක් අවශ්‍ය වුවත් එවැනි දෙයක් රටේ නොවන බවත් ක්ෂුද්‍ර කුඩා හා මධ්‍ය පරිමාණ කර්මාන්තකරුවන් කඩා වැටී ඇති බවත් රටේ ප්‍රශ්නවලට උත්තර නොමැති බවත් මෙවැනි තත්ත්වයක් තුළ ඉදිරියට යා නොහැකි බවත් 2028 සිට ඇ. ඩොලර් බිලියන 5.5ක් වාර්ෂිකව ණය ගෙවිය යුතු බවත් ඒ සඳහා අප රටට ශක්තියක් ඇත් ද කියා ප්‍රශ්න කළ යුතු බවත් විපක්ෂ නායකවරයා පෙන්වා දුන්නේය.

මේ යන විදිහට 2028 වන විට තවදුරටත් නව බංකොලොත්භාවයක් නිර්මාණය විය හැකි බවට බියක් ඇති වන බවත් මේ යන ක්‍රමය සුදුසු නොවන බවත් රට ගොඩනගන ඉලක්ක කරා යා නොහැකි බවත් රජය මේ දැවෙන ප්‍රශ්නවලට විසදුම් ලබා නොදෙන බවත් විපක්ෂය පවා ඉදිරියට එන්නේ රට ගොඩනගන සංකල්ප මත බවත් රට ගොඩනගන ප්‍රතිපත්ති සමූහය මත එකට එකතු වෙනවා මිස බලය ලබා ගැනීමට හෝ තනතුරු බෙදා ගැනීමට එකට එකතු නොවන බවත් විපක්ෂ නායකවරයා පැවසීය.

නයිජිරියාවෙන් ජිහාඩ් සටන්කාමීන්ට ප්‍රහාරයක්

නයිජිරියානු ආරක්ෂක අංශ එල්ල කළ ගුවන් ප්‍රහාර මාලාවකින් ජිහාඩ් සටන්කාමීන් 35 දෙනෙකු ජීවිතක්ෂයට.

අද ප්‍රදේශ කිහිපයක උණුසුම ඉහළට!

දිවයිනේ ප්‍රදේශ කිහිපයක මිනිස් සිරුරට දැනෙන උණුසුම අද(25) අවධානය යොමුකළ යුතු මට්ටමක පවතින බව කාලගුණ විද්‍යා දෙපාර්තමේන්තුව පවසයි.

එම දෙපාර්තමේන්තුව පැවසුවේ උතුරු, උතුරු-මැද සහ නැගෙනහිර පළාත් මෙන්ම හම්බන්තොට, මොණරාගල දිස්ත්‍රික්කවල ජනතාව ඒ පිළිබඳ අවධානය යොමුකළ යුතු බවයි.

channel 7

Today News

පොහොය දවසේ මත්පැන් අලෙවි කරපු රාත්‍රී සමාජ ශාලාව

සිසුන් 50ට අඩු පාසල් 1506 ක්(WAKE UP TO 7)

නිවසක සිටි යුවළකට ආයුධවලින් පහරදී ඝාතනය කරලා

LIVE

Channel7 සජීව විකාශය නැරඹීමට පිවිසෙන්න

දින 60ක සටන් විරාමයකට ඊශ්‍රායලය සූදානම් බව ඇමරිකානු ජනපති ඩොනල්ඩ් ට්‍රම්ප් පවසයි