ජනාධිපති හා ජර්මනියේ සංචාරක කර්මාන්ත වල නියෝජිතයන් හමුව අද

ජර්මානු ෆෙඩරල් ජනරජයේ නිල සංචාරයක නිරත ජනාධිපති අනුර කුමාර දිසානායක අද (13) ජර්මනියේ සංචාරක සහ චාරිකා කර්මාන්ත සමාගම්වල නියෝජිතයින් හමුවීමට නියමිතයි.

හමුව බර්ලීනයේ වැල්ඩොෆ් ඇස්ටෝරියා හෝටලේදී සිදු කෙරේ. ඉන් අනතුරුව ජනාධිපති අනුර කුමාර දිසානායක ජර්මනියේ වාණිජ හා කර්මාන්ත මණ්ඩලය සංවිධානය කරනු ලබන ව්‍යාපාරික සංසදයට සහභාගී වේ.

එය ජර්මනියේ වාණිජ හා කර්මාන්ත සංගම් මූලස්ථානයේ පැවැත්වෙනවා. ඉන් අනතුරුව අද පස්වරුවේ බර්ලීනයේ වැන්ඩොෆ් හෝටලේදි එරට ආර්ථික සහයෝගීතා සහ සංවර්ධන අමාත්‍ය ඊම් අලබලි රිඩෝවන් මහත්මිය හමුවීමට නියමිතය.

පස්වරුවේ ජනාධිපතිවරයා ජර්මනියේ සිටින ශ්‍රී ලංකා ප්‍රජාවද හමුවේ.

බෝරා සමුළුව සාර්ථක කර ගැනීමට රජයෙන් උපරිම සහාය

ගෝලීය බෝරා ප්‍රජාවගේ අධ්‍යාත්මික සමුළුව සහ ප්‍රදර්ශනය ජූලි මස 27 වන දා සිට ජුලි 05 දක්වා කොළඹදී පැවැත්වෙයි. මෙය සිදු වන්නේ ආධ්‍යාත්මික නායක ආචාර්ය අති උතුම් සෙයියදිනා මුෆද්දල් සෙයිෆුද්දීන් සහෙබ් තුමාගේ සහභාගීත්වයෙන් .

ඒ සඳහා අවශ්‍ය පහසුකම් සැපයීම සඳහා වන සාකච්ඡාවක් ඊයේ ජනාධිපති ලේකම් කාර්යාලයේදී සිද්ධ වුණා. ඒ ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙනුයි.

එහිදී බෝරා ප්‍රජාවගේ ආධ්‍යාත්මික සමුළුව සහ ප්‍රදර්ශනය සාර්ථක කර ගැනීමට උපරිම සහය ලබා දෙන ලෙස අදාළ නිලධාරීන්ට ජනාධිපති ලේකම්වරයා විසින් උපදෙස් දෙනු ලැබුවා.

ප්‍රදර්ශනය සහ සමුළුව සඳහා ඉන්දියාව ඇතුළු රටවල් රැසක බෝරා ප්‍රජාවගේ සාමාජිකයින් පැමිණීමට නියමිතයි.ඔවුන් වෙනුවෙන් ගුවන්තොටුපල පහසුකම් ,ඇතුළු සෙසු පහසුකම් සැපයීම සම්බන්ධයෙන් දීර්ඝ ලෙස සාකච්ඡා කෙරුණා.

මේ සඳහා විදේශ කටයුතු අමාත්‍යංශයේ ලේකම් අරුණි රණරාජා, ජනාධිපති ජේෂ්ඨ අතිරේක ලේකම් රෝෂන් ගමගේ යන මහත්ම මහත්මීන් ඇතුළු බෝරා ප්‍රජාවගේ ආගමික නායකයන් පිරිසක් එක්වුණා.

ඊශ්‍රාලයෙන් ඉරානයට ගුවන් පහර

ඊශ්‍රායලය විසින් ඉරානයේ න්‍යෂ්ටික වැඩසටහනට සහ ජ්‍යෙෂ්ඨ හමුදා නායකයින් ඉලක්ක කර ගනිමින් ගුවන් ප්‍රහාරයක් දියත් කර තිබේ.
ඉරානයේ ටෙහෙරාන් අගනුවර ඇතුළු ස්ථාන කිහිපයක් වෙත ඊශ්‍රායලය විසින් ඊයෙ මෙම ප්‍රහාර මාලාව එල්ල කර ඇත.

‘සතුරා අඩපණ කිරීමේ ප්‍රහාර’ ලෙස ඔවුන් මෙය නම් කර තිබේ.ප්‍රහාර හමුවේ ඉරානයේ වඩාත් බලගතු පුද්ගලයෙක් ලෙස සැලකෙන ඉස්ලාමීය විප්ලවවාදී ආරක්ෂක බළකායේ ප්‍රධාන අණදෙන නිලධාරී ජෙනරාල් හොසේන් සලාමි මිය ගොස් ඇත. මේ අතර ඊශ්‍රායලය විසින් රටටම හදිසි තත්ත්වයක් නම්කර පාසල් ඇතුළු සියලු සේවා අත්හිටුවා ඒකරාශීවීම්ද තහනම් කිරීමට පියවර ගෙන තිබේ.ඒ ඉරානය ඊට නිසැකව ප්‍රතිචාර දක්වනු ඇති බවට පවතින සැකය මතයි.
ප්‍රහාර සඳහා එක්සත් ජනපද මැදිහත්වීමක් හෝ එක්සත් ජනපද සහායක් නොතිබූ බව රාජ්‍ය ලේකම් මාර්කෝ රුබියෝ පැවසීය.
“අද රාත්‍රියේ ඊශ්‍රායලය ඉරානයට එරෙහිව ඒකපාර්ශ්වික ක්‍රියාමාර්ගයක් ගත්තා. අපි ඉරානයට එරෙහි ප්‍රහාරවලට සම්බන්ධ නොවන අතර අපගේ ප්‍රමුඛතාවය වන්නේ කලාපයේ ඇමරිකානු හමුදා ආරක්ෂා කිරීමයි” ඔහු පැවසීය.

2025 ලෝක ටෙස්ට් ශූරතාවලියේ ඔස්ට්‍රෙලියනුවන්ට දැඩි පීඩනයක්

ලෝක ටෙස්ට් ශූරතාවලියේ පළමු දිනය අවසන් වන විට සිය පළමු ඉනිම ක්‍රීඩා කරන දකුණු අප්‍රිකාවෙ ලකුණු 43 කට කඩුලු 4 ක් දවා ගැනීමට ඕස්ට්‍රේලියානු වේග පන්දු යවන්නන් සමත් වුනා.මිචෙල් ස්ටාර්ක් ආරම්භක පිතිකරුවන් දෙදෙනාම දවා ගත් අතර පැට් කමින්ස් සහ ජොෂ් හේසල්වුඩ් එක් කඩුල්ල බැගින් දවා ගත්තා.ඕස්ට්‍රේලියාව සහ දකුණු අප්‍රිකාව අතර ලෝඩ්ස්හිදී පැවති 2025 ICC ලෝක ටෙස්ට් ශූරතාවලියේ (WTC) අවසන් මහා තරගය ඊයේ ආරම්භ වුණා.

දිනය අවසන් වන විට දෙපිලේම කඩුලු 14 ක් බිඳ වැටුණු අතර දිනය තුළ රැස් කළේ ලකුණු 255 ක් පමණි.දිනයේ මුල් ඉනිම් දෙක තුලදී තරගයේ ආධිපත්‍ය තබා ගැනීමට දකුණු අප්‍රිකාව සමත් වුනා.ඒ ඕස්ට්‍රේලියාවේ සියලු ක්‍රීඩකයින් ලකුණු 212 කට දවා ගනිමින්. කගීසෝ රබාඩා ලකුණු 51 කට කඩුලු 5 ක් දවා ගැනීමට සමත් විය.පිළිතුරු වශයෙන් ක්‍රීඩා කරන දකුණු අප්‍රිකානු පිල මේ වනවිට කඩුලු 4 ක් දැවී ලකුණු 62 ක් ලබා ගෙන ඇත. දකුණු අප්‍රිකානු නායක ටෙම්බා බවුමා (26*) හා ඩේවිඩ් බෙඩින්හැම් (17*) කඩුල්ලේ රැදී සිටී.2025 ICC ලෝක ටෙස්ට් ශූරතාවලියේ අවසන් මහා තරගය එංලන්තයේ ලෝඩ්ස් පිටියේදී ඊයේ ආරම්භ විය. අද තරගයේ දෙවන දිනයයි.

රුසියාව සිය යුද අවි පද්ධති නවීකරණයට සුදානම්

රුසියාව නවීනතම අවි පද්ධති ගොඩනැගීම කෙරෙහි අවධානය යොමු කළ යුතු බව රුසියානු ජනාධිපති Vladimir Putin මහතා පවසයි. ඊයේ(11) ජාතික හමුදා උපකරණ පිළිබඳ රැස්වීමක දී හෙතෙම මේ බව පැවසීය. ආයුධ සංචිතය ප්‍රමාණවත් විය යුතු බව ද ඔහු පවසා ඇත.

2027-2036 රුසියානු නව අවි සැලැස්ම සැකසීම එම රැස්වීමේදී නිල වශයෙන් ආරම්භ විය. ඉදිරි දශකය තුළ රුසියාව හමුදා පද්ධතියේ සංවර්ධනය සඳහා මෙම සැලැස්ම උපයෝගී කර ගනු ඇත.නව ජාතික අවි සැලැස්මෙන් “න්‍යෂ්ටික බලය” කෙරෙහි විශේෂ අවධානයක් යොමු කළ යුතු බව Putin මහතා එහිදී සඳහන් කළේ ය. රුසියානු අභ්‍යවකාශ හමුදාවන් සඳහා ආයුධ පර්යේෂණය කිරීම, ප්‍රසම්පාදනය, නවීකරණයෙන් දියුණු කිරීම සහ නඩත්තු කිරීම සඳහා ක්‍රමානුකූල ප්‍රවේශයක් ලබා දිය යුතු බව ද හෙතෙම පැවසීය. -CGTN Sinhala

චීන-ඇමරිකා ආර්ථික හා වෙළඳ සාකච්ඡා යාන්ත්‍රණයේ පළමු රැස්වීම ලන්ඩන්හිදී

චීන-ඇමරිකා ආර්ථික හා වෙළඳ සාකච්ඡා යාන්ත්‍රණයේ පළමු රැස්වීම ප්‍රාදේශීය වේලාවෙන් ජුනි 9 වැනිදා සිට 10 වැනිදා දක්වා ලන්ඩන්හිදී පැවැත්විණ. චීන-ඇමරිකානු ආර්ථික හා වෙළඳ කටයුතු පිළිබඳ චීන පාර්ශ්වයේ ප්‍රධානි, උප අගමැති He Lifeng මහතා සහ ඇමරිකානු පාර්ශ්වයේ ප්‍රධානි, එරට භාණ්ඩාගාර ලේකම් Scott Bessent, වාණිජ ලේකම් Howard Lutnick සහ වෙළඳ නියෝජිත Jamieson Greer යන මහත්වරු එම රැස්වීමට එක්වූහ. දෙපාර්ශ්වය අවංක හා ගැඹුරු සංවාදයක් පැවැත්වූ අතර, අන්‍යෝන්‍ය වශයෙන් සැලකිලිමත් වන ආර්ථික හා වෙළඳ ගැටලු පිළිබඳව ගැඹුරින් අදහස් හුවමාරු කර ගනිමින්, ජුනි 5 වනදා රාජ්‍ය නායකයින් දෙදෙනා විසින් ඇති කරගත් වැදගත් එකඟතාවය ක්‍රියාත්මක කිරීම සහ ජිනීවා ආර්ථික හා වෙළඳ සාකච්ඡාවල ප්‍රතිඵල තහවුරු කිරීම සම්බන්ධයෙන් ප්‍රතිපත්තිමය එකඟතාවයකට පැමිණ තිබේ. දෙපාර්ශ්වයේ ආර්ථික හා වෙළඳ ගැටලු විසඳීමේදී රැස්වීමෙන් නව ප්‍රගතියක් ලබා ගැනිණ.

චීන-ඇමරිකානු ආර්ථික හා වෙළඳ සබඳතාවල හරය අන්‍යෝන්‍ය ප්‍රතිලාභ සහ පොදු ජයග්‍රහණය බව චීන ප්‍රධානියා එහිදී පැවසීය. වෙළඳ යුද්ධයකින් ජයග්‍රාහකයෙකු බිහි නොවේ. චීනය සටන් කිරීමට කැමැත්තක් නොමැති නමුත් සටන් කිරීමට බිය ද නැත. දෙපාර්ශ්වයම සමාන සංවාදයකින් සහ අන්‍යෝන්‍ය වශයෙන් වාසිදායක සහයෝගීතාවයකින් ආර්ථික හා වෙළඳ වෙනස්කම් විසඳා ගත යුතුය. ආර්ථික හා වෙළඳ සාකච්ඡාවලදී චීනය අවංක හා ප්‍රතිපත්තිගරුක ආකල්පයක සිටියි. ඊළඟ පියවර වශයෙන්, දෙපාර්ශ්වය දුරකථන සංවාද අතරතුර රාජ්‍ය නායකයින් දෙදෙනා ඇති කරගත් වැදගත් එකඟතාවය සහ අවශ්‍යතාවලට අනුකූලව දෙරටේ ආර්ථික හා වෙළඳ සාකච්ඡා යාන්ත්‍රණයේ කාර්යභාරය තවදුරටත් ඉටු කළ යුතුය. එසේම අඛණ්ඩව පොදු අදහස් රැස් කරමින්, වැරදි අවබෝධය අවම කරමින් සහයෝගීතාව ශක්තිමත් කිරීමට අපේක්ෂා කරන බව ද චීන පාර්ශ්වය එහිදී අදහස් පළ කළේය.

දෙපාර්ශ්වය එකිනෙකා දෙසට ගමන් කරමින් සිය පොරොන්දු ඉටු කළ යුතු ය. සන්නිවේදනය සහ සංවාදය පවත්වා ගත යුතු අතර චීන-ඇමරිකානු ආර්ථික හා වෙළඳ සබඳතාවල ස්ථාවර හා දිගුකාලීන සංවර්ධනය ප්‍රවර්ධනය කළ යුතු බවත්, ලෝක ආර්ථිකයට වඩාත් නිශ්චිතභාවයක් සහ ස්ථාවරත්වයක් එකතු කළ යුතු බවත් එම රැස්වීමේදී චීනය නැවත අවධාරණය කර ඇත.

මෙම රැස්වීම ධනාත්මක ප්‍රතිඵල අත්කර ගෙන ඇති බවත්, ද්විපාර්ශ්වික ආර්ථික හා වෙළඳ සබඳතා තවදුරටත් ස්ථාවර කර ඇති බවත් ඇමරිකානු පාර්ශ්වය ප්‍රකාශ කළේය. රාජ්‍ය නායකයින් දෙදෙනාගේ දුරකථන සංවාදයේ ජීවගුණයට අනුව මෙම රැස්වීමේ එකඟතාවය ඒකාබද්ධව ක්‍රියාත්මක කිරීම සඳහා චීනය සමඟ කටයුතු කිරීමට ඇමරිකාව කැමැත්තෙන් සිටින බව ද එහිදී ප්‍රකාශ කෙරිණ.
-CGTN Sinhala

චීන අධ්‍යයන දෙවැනි සමුළුව අද කොළඹදී ඇරඹේ.

දකුණු ආසියානු සයිනොලොජි (චීන අධ්‍යයන) විද්‍යාඥයින්ගේ දෙවැනි සමුළුව අද ශ්‍රී ලංකාවේදී පැවැත්වේ.
ලෝක සයිනොලොජි මධ්‍යස්ථානය, කැලණිය විශ්ව විද්‍යාලය සහ ශ්‍රී ලංකා – චීන සංගමය එක්ව අද (12) සහ හෙට (13) මෙම සමුළුව පැවැත්වීමට නියමිතය.
මෙහිදී සයිනොලොජි පර්යේෂණවල අධ්‍යයන අවබෝධයන් සහ චීන ජයග්‍රහණ බෙදා ගැනීමට සූදානම් වේ.
සමුළුවේ තේමාව වන්නේ ” සයිනොලොජි සහ චීන අධ්‍යයනවල දෘෂ්ටිකෝණයෙන් – දකුණු ආසියාවේ මානව වර්ගයා සඳහා බෙදාගත් අනාගතයක් සහිත ප්‍රජාවක භාවිතය සහ ගවේෂණය ප්‍රවර්ධනය කිරීම” යන්නයි.
සමුළුවට චීනය, නේපාලය, ඉන්දියාව, පාකිස්ථානය, බංගලාදේශය සහ ශ්‍රී ලංකාව යන රටවලින් පැමිණි විද්වතුන් තිහකට ආසන්න සංඛ්‍යාවක් සහභාගී වේ.
ඔවුන් විසින් ප්‍රධාන දේශන සහ සමාන්තර සංසද හරහා කලාපීය සයිනුලොජි සහ චීන අධ්‍යයන සංවර්ධනයට අදාළ ගැටලු සාකච්ඡා කරනු ඇත.

සිවිල් වැසියන් රඳවා තබා ගැනීමේ බලය සහිතව මැරීන් බටයින් LA වීදිවල යොදවයි

ඇමරිකානු මැරීන් බටයින් දින දෙකක් ඇතුළත ලොස් ඇන්ජලීස් වීදි වල ජාතික ආරක්ෂක භටයින්ට සමග එක්වීමට නියමිතය.
වැටලීම් වලදී ආගමන නිලධාරීන්ට බාධා කරන ඕනෑම අයෙකු හෝ ෆෙඩරල් නියෝජිතයින්ට බාධා පමුණුවන විරෝධාකරුවන් රඳවා තබා ගැනීමට මැරීන් බටයින්ට බලය ලබාදී ඇත.
කැලිෆෝනියා ආණ්ඩුකාර ගැවින් නිව්සම් ගේ විරෝධතා නොතකා එක්සත් ජනපද ජනාධිපති ඩොලර් ට්‍රම්ප් හමුදා යෙදවීමට නියෝග කළේය.
එක්සත් ජනපද හමුදාව බදාදා ප්‍රකාශ කළේ මැරීන් බටයින් හත්සිය දෙනකු ගෙන් යුත් බලඇණියක් ලොස් ඇන්ජලීස් මෙහෙයුමට විශේෂිත පුහුණුවක් ලබාදී අවසන් කර ඇති බවයි.
ඔවුන් පැය 48ක් ඇතුළත ජාතික ආරක්ෂක බලකායට එක්වීමට නියමිතයි.
සිවිල් පොලිස් කටයුතු සිදු කිරීමෙන් තොරව ෆෙඩරල් නිලධාරීන්ට සහ දේපළ ආරක්ෂා කිරීමට මැරීන් බටයින් බැඳී සිටින බව එක්සත් ජනපද හමුදාව පවසයි.
සංක්‍රමණික වැටලීම් මාලාවකට ප්‍රතිචාර වශයෙන් පසුගිය සිකුරාදා එක්සත් ජනපදය තුළ විරෝධතා ඇති විය.
ඇමරිකානු ජනාධිපති ඩොනල්ඩ් ට්‍රම්ප් සෙනසුරාදා ජාතික ආරක්ෂක බළකාය කැදවූ අතර පසුව සඳුදා මැරීන් භටයින් කැඳවීය.
“මම ඒ ගැන ඉක්මනින් ක්‍රියා නොකළේ නම්, ලොස් ඇන්ජලීස් මේ මොහොතේ ගිනිගෙන බිමටම සමතලා වේවි,” ජෝන් එෆ්. කෙනඩි රංගන කලා මධ්‍යස්ථානයේ පැවති උත්සවයකදී ට්‍රම්ප් පැවසීය.

-Reuters-

ජනපති සහ ජර්මානු විදේශ අමාත්‍යවරයා අතර හමුවක්

ජර්මානු ෆෙඩරල් ජනරජයේ නිල සංචාරයක නිරත ජනාධිපති අනුර කුමාර දිසානායක මහතා සහ එරට විදේශ කටයුතු අමාත්‍ය ජොහාන් වඩෆු මහතා අතර සාකච්ඡා පැවැත්විය. ඊයේ පස්වරුවේ පැවැති මෙම සාකච්ඡ ජර්මනියේ බර්ලිනහි වොල්ඩෝ ඇස්ටෝරියා හෝටලයේදී සිදු කෙරුණි.
රජයේ ප්‍රමුඛතා මත පදනම්ව වෙළෙඳ , ඩිජිටල් ආර්ථිකය ,ආයෝජන සහ වෘත්තීය පුහුණු අවස්ථා ඇතුළු දෙරටේ සහයෝගිතාව පුළුල් කෙරෙන නව මාර්ග පිළිබඳව මෙහිදී දෙපාර්ශවයේ විශේෂ අවධානයට යොමු වුණා.
මේ අවස්ථාවට විදේශ කටයුතු, විදේශ රැකියා සහ සංචාරක අමාත්‍ය විජිත හේරත් ,ජර්මනිය ශ්‍රී ලංකා තානාපති වර්ණ මුතකුමාරණ ඇතුළු නිලධාරීන් පිරිසක් එක් වුණා.

ශ්‍රී ලංකා ජනපතිට ජර්මනියේදී රාජ්‍ය ගෞරව සහිත පිළිගැනීමක්

ජනපති ජර්මානු ජනපති හමුවෙයි.

ජර්මානු ෆෙඩරල් ජනරජයේ නිල සංචාරයක නිරත ජනාධිපති අනුර කුමර දිසානායක මහතාව බර්ලිනයේ බෙල්විව් මන්දිරයේ දී ජර්මානු ත්‍රිවිධ හමුදා උත්තමාචාර සහිතව පිලිගනු ලැබුවා.

නිල පිළිගැනීමේ උත්සවයෙන් අනතුරුව ජනාධිපති අනුර කුමාර දිසානායක මහතා සහ ජර්මනු ජනාධිපති ෆ්‍රෑන්ක් වෝල්ටර් ස්ටයින්මයර් අතර ද්වීපාර්ශික සාකච්ඡා පැවැත්වුණා.

එහිදී දෙරට අතර ආර්ථික හා ජාත්‍යන්තර සම්බන්ධතා ශක්තිමත් කිරීම සම්බන්ධයෙන් දීර්ඝ වශයෙන් සාකච්ඡා කෙරුණා. වෘත්තීය පුහුණු සහ සංචාරක කර්මාන්ත යන ක්ෂේත්‍රයන්හි සහයෝගීතාවය වර්ධනය කිරීම කෙරෙහි විශේෂ අවධානය යොමු වුණා.

channel 7

Today News

පොහොය දවසේ මත්පැන් අලෙවි කරපු රාත්‍රී සමාජ ශාලාව

සිසුන් 50ට අඩු පාසල් 1506 ක්(WAKE UP TO 7)

නිවසක සිටි යුවළකට ආයුධවලින් පහරදී ඝාතනය කරලා

LIVE

Channel7 සජීව විකාශය නැරඹීමට පිවිසෙන්න

දින 60ක සටන් විරාමයකට ඊශ්‍රායලය සූදානම් බව ඇමරිකානු ජනපති ඩොනල්ඩ් ට්‍රම්ප් පවසයි